بلوچ اسٹوڈنٹس ایکشن کمیٹی ءِ سیمی بنجاھی پتر ءِ دیوان سر کماش شبیر ءِ سروکی ءَ دو روچ ءَ گوں دلجمی ءَ برجم دارگ بوتگ۔ دو روچی دیوان ءِ تہ ءَ مزن کارگشاد ءِ بنجاھی اھوال کہ آھانی تہ ءَ کُلیں پترانی اھوال، نگدکاری، گَل ء کار، ھندی ءُ میان استمانی سیاسی جاور ءُ آوکیں گامگیج ھوار بوتگ اَنت۔ دیوان ءَ سرجمیں بنگپانی سر ءَ دلجمی ءَ گوں گپ ءُ تران ءَ پد آوکیں گامگیج ءِ تہ ءَ جتائیں سوڑگ زورگ بوتگ اَنت۔
دیوان ءِ اولی روچ ءِ بندات چہ بنجاھی کماش ءِ موکل ءَ کنگ بوتگ اولی روچ ءِ بنداتی بھر ءَ گوستگیں بنجاھی ھال کہ دیوان ءِ دیم ءَ پیش کنگ بوتگ اَنت کہ آیانی تہ ءَ گل ءِ کُلیں پترانی اھوالاں ھوار آدگہ مزن مزنیں مراگش، سباء لٹریری پیسٹیول ءِ مراگشانی ھاال، بلوچستان کتاب کاروان ءُ بلوچ لٹریسی کیمپئین ءِ ھال ءَ ھوار گل ءِ کُلیں کار دیوان ءِ دیم ءَ پیش کنگ بوتگ اَنت۔
بنجاھی دیوان ءِ دومی بھر نگدکاری بوتگ کہ آئی ءِ تہ ءَ سنگتاں گوستگیں گل ءِ کارکردگی سر ءَ چمشانک دیان ءَ کسان ءُ مزنیں نزوری شون دیان ءَ نگد کرتگ ءُ پہ کارانی گھتر ءُ شرتر کنگ ءَ جتائیں شور ءُ سلاہ داتگ اَنت۔ نگد ءِ سر ءَ سنگتاں تران کنان ءَ گوْشتگ کہ نگد ھما سلاہ اِنت کہ آئی ءَ چہ یک سیاسی جھدکارے وتی سیاسی کِرد ءَ تراش ایت ءُ گل ءَ چہ کُلیں رد سیاسی رویشت ءُ کاراں چہ رکین ایت۔ زانشتی ءُ سنگینی نگداں چہ گل وت ءَ روچ پہ روچ مھکمتر کنان ءَ وتی مکسد ءِ سوبمندی نیمگ ءَ جُنزان کنت۔ مئے جھدکار نگد ءَ چہ مہ تُرس اَنت بلکیں آئی ءَ وش اتک بہ کن اَنت کہ آئی ءِ سر ءَ نگد بیگ اِنت، بزاں آ جھدکار ءُ گل کار ءَ اِنت کہ نگد بیگ اِنت۔ نگدءَ چہ تچوکیں جھدکار نزوریں سیاسی سِنچ ءِ واھُند بنت ءُ نزوریں سوچ ءَ چہ بلوچ نودربر سیاست گھتر ءُ دیمروئی کُت نہ کنت۔
دیوان ءِ دومی روچ ءِ اولی بھر گل کار بوتگ کہ آئی ءِ تہ ءَ بنجاھی سنگتاں ءَ تران کنان ءَ گوْشتگ کہ گل مرچی جتائیں پروگرام ءُشونداتانی وسیلہ ءَ نہ تھنا گل ءِ کار کنگ اِنت بلکیں گل وت ءَ مھکم کنان ءَ کیڈرسازی ءِ کار ءَ ھم اولی سرپءَ اوشتاتگ۔ اے سنگتانی شپ ءُ روچی ئیں کارانی برورد اِنت کہ بلوچ نودربر سیاست روچ پہ روچ مھکم ءُ شاھگان بیان اِنت، بلے چوشکہ سیاست مٹ بیوکیں کارے داں وھدیکہ ما وتی سوچ ءُ پِگر ءِ تہ ءَ دیمروئی ءُ آشوب میار ایں گڑا مئے سیاسی کار روایتی ءُ ھوادگ بنت چیاکہ سیاست ءِ تہ ءَ ھچ چیز دیوال ءِ سر ءَ نبشتگیں لبز نہ اَنت کہ برجاہ بنت بلکیں بلوچ ورناھاں مرچیگیں دور ءِ کچ ءَ وتی سوچ ءُ پِگر توانا کنگی اَنت ءُ وتی سرجمیں زِند ءُ کارگوں راجی جھد ءَ بندوک کنگی اَنت ءُ ہرچ ڈولیں ترندیں جاورانی دیم ءَ مھکمی ءَ اوشتگی اِنت۔
دیوان ءَ گل ءِ بنجاھی کماش ءَ تران کنان ءَ گوْشتگ کہ مئے ورنا وتی جِند ءُ اے اھد ءِ کدر ءُ ارزشت ءَ بہ زان اَنت ءُ وتی بستار ءَ پجاہ بیار اَنت کہ آ چنچو مزن مزنیں کار کُت کن اَنت، پمیشکا آھاں وتی بودناکی ءُ لاھکی زوال کنگ ءِ جاہ ءَ پہ راجی گھتری ءَ کار بندگی اَنت۔ اے وھد ءَ یک بلوچ ورنایے ءَ شیوار ءُ بیگی اِنت ءُ وت ءَ چہ در سیاسی رویشت ءُ نادُراھیاں رکینگی اِنت پرچاکہ مئے نپری تاوان سرجمءَ راجی تاوان ءِ کالب ءَ کیت ءُ راج ءَ تاوان دات کنت۔ بلوچ ورنا زیت دمبرگ ءُ ارزانیءَ دلجم بیگ ءِ جاہ ءَ یکشلیں جھد ءِ لیکہ ءَ مھکم بہ کن اَنت ءُ نودربر سیاست ءِ مھکم کنگ ءَ وتی کاملیں زوراں بہ جن اَنت۔
دیوان ءِ چارمی بھر ھندی ءُ میان استمانی سیاسی جاور بوتگ کہ آئی ءِ تہ ءَ بنجاھی سنگتاں تران کرتگ ءُ گوْشتگ کہ میان استمانی سیاست ھما پِڑ اِنت کہ گندگ ءَ بگندئے بے توار ءُ میزان ءَ جُنزان اِنت بلے اشی ءِ پُشت ءَ مزن مزنیں جنگ ءُ جدل جنزگ ءَ اَنت۔ میان استمانی سیاست ءِ تہ ءَ اناگت یک ویلے سیاسی بنگپےءَ مٹ کنت بلے چوش نہ اِنت کہ سرجم ءَ ھمے ویل سیاست ءَ سُرین ایت بلکیں اشی ءِ پُشت ءَجنزوکیں زمینی، راجی، دینی، مالی ءُ آدگہ جیڑہ اَنت کہ یکبرءَ یک ویلے اشاں ترانز(چنگاری) دنت ءُ اِش پاھار بنت در کائینت ءُ دیمتر ءَ اِے جنگ ءِ دروشم ءَ جھانءِ سیاست ءَ مٹ کن اَنت۔ دنیا ءِ تہ ءَ ھمے ڈولیں ویل میاں استمانی سیاست ءِ سر ءَ سان بنت بلے مرچی دنیا ءِ تہ ءَ سدانی کچ ءَ سیاسی جیڑہ ھست کہ دنیا آیانی نیمگ ءَ آ کچ ءَ دلگوش گوْر نہ کنت ءُ دومی نیمگ ءَ دنیا کہ ملٹی پولر ءِ نیمگ ءَ شُتگ ءُ ھرچ استان ءَ وتی نپ ءُ سیت یک استانے ءَ گیش باز استان ءَ گوں بندوک کُتگ اَنت ءُ چوشکہ دنیا ءِ ھرچ استان ءِ وتی جیڑہ ءُ جنجال باز اَنت پمیشکا باز سیاسی جیڑہ یا جنگ دنیاءَ بازیں مُلکاں دلگوش گور کنگ نہ بنت۔
دیوان ءِ سرجمیں بھرانی سرءَ گوں دلجمی ءَ گپ ءُ ھبر ءَ پد گُڈی بنگپ آوکیں گامگیج ءِ تہ ءَ پہ گیشیں کار ءُ گل ءِ مھکم ءُ پہ برجاہ دارگءَ جتائیں شوندات ٹاھینگ بوتگ ءُ سوڑگ زورگ بوتگ کہ چو اے ڈول ءَ اَنت، اے میان ءَ گل ءِ سرجمیں ھنکیناں لیڈرشپ ورکشاپ اڈ دیگ بیت، نمیرانیں کمانچر بلوچ ءِ یات ءَ لیاری ءَ لیاری آرٹس اِگزیبیشن اڈ دیگ بیت، کیچ، ملیر ءُ ڈی جی ھان ءَ سباء لٹریری پیسٹیول برجم دارگ بیت، بلوچ لٹریسی کیمپئین ءِ وسیلہ ءَ پہ نودربراں کیرئیر کونسلنگ ءِ کتابُکے چاپ ءُ شِنگ کنگ بیت، ڈیجیٹل لٹریچر ءِ درْچ ءَ ڈیجیٹل لکچر جوڈ کنگ بیت کہ آئی ءِ تہ ءَ نوْشت لکچر ھم ھوار اَنت، اے کُلیں سوڑگاں ھوار دگہ کسان ءُ مزنیں سوڑگ زورگ بوتگ اَنت ءُ پہ گل ءِ ھنکینانی مھکم کنگ ءَ شوندات ٹائینگ بوتگ۔
دیوان ءِ سرجمیں بھرانی سر ءَ گوں دلجمی ءَ گپ ءُ تران ءُ آوکیں گامگیج ءِ تہ ءَ جتائیں سوڑگ زورگ ءَ پد سیمی بنجاھی دیوان دو روچ ءِ دیوان ءَ پد چہ بنجاھی کماش ءِ رزا ءَ آسر کنگ بوتگ۔
