بلوچ راجی زرمبشت ( بی این ایم ) ءِ سرکماش ڈاکٹر نسیم ءَ ماں چاگردی رسانکدر ایکس ءَ گریشگ ءَ پاکستانی لشکر ءِ زوراکیانی پژدر ءَ نبشتگ کہ ھزدار ءِ ھند گریشگ کوچو ءَ ریاستی لشکر ءِ ناشرکاری۔ وتگڑیں سی ٹی ڈی ءَ ھزدار ءِ ھند گریشگ کوچو ءَ یک سرجمیں میتگے ءِ سر ءَ ارش کرتگ۔ مرد ءُ جنینانی سر ءَ تیرگواری کرتگ ایشی ءِ آسر ءَ باز مردم ٹپی بوتگ اَنت۔ شش ورنا آوار جنگ ءَ پد زور بیگواہ کنگ بوتگ اَنت۔آ شاہ جان ء سلیم جان، گوھردین ء ھیرجان، مھم جان ء لال بکش، میار ء لال بکش، آرپ ء ابدرھمان ءُ منیر اھمد ء سبرو اِنت۔ منیر چہ آزار دیگ ءَ پد دگ ءِ پھنات ءَ چگل دیگ بوتگ۔
آئی ءَ گوشتگ کہ لال بکش ء ابراھیم، سبرو ء جمال ءُ سے جنین ٹپی بوتگ اَنت، ریاستی لشکر ءَ گس پرشت ءُ پروش کرتگ اَنت، موبائل پون ءُ زر لٹ ءُ پل کرتگ اَنت ءُ سے چاتانی سر ءَ جتگیں سولر سسٹم تباہ کرتگ اَنت۔
ڈاکٹر نسیم ءَ گوشتگ کہ کھولاں زھرشانی ءَ نال ٹوبڑو ءَ سی پیک دگ بند کرتگ۔ ھندی واکدار ھمے میاربارانی ناشریانی چیر دیگ ءِ جھد ءَ اِنت۔ بلے مردم زوراکی ءِ بگیری ءَ اوشتاتگ اَنت۔
