نال: گریشگ ءَ سی ٹی ڈی ءِ دست ءَ آوار جنگ بوتگیں مردمانی کھولاں چہ زھرشانی نندانک ءَ پریس کانپریس کرتگ ءُ گوشتگ کہ پرندوشی شپ ءِ چار ءِ نزیک ءَ وردی ءُ سادگ پوشاکیں مردماں کہ آیاں ا بدالواھد ء سلیم، ھیر جان ء مھم جان، ابدرھمان ء شاہ میر ءِ گس ءِ سر ءَ بیڑ برتگ ءُ زور گساں پترتگ اَنت ءُ لٹ ءُ کنگ ءِ ھواری ءَ سولر ھم تاوان داتگ ءُ پہ زور شاہ جان ء سلیم، گورھان ء ھیرجان، آرپ ء ابدرھمان، مھم جان ء لال بکش، میار ء لال بکش ، منیر ء سبرو آوار جتگ اَنت۔ پد ءَ منیر اھمد ء سبرو راہ ءَ یل کنگ بوتگ آدگہ درسیں چیریں آزارجاھے ءَ بند اَنت داں مرچی آیانی ھچ وڑیں ھال نیست۔
آئیءَ گوشتگ کہ ما چہ زی ءَ سی پیک دگ ءِ سر ءَزھرشانی ءَ نشتگیں، زی سی پیک دگ گری گریشگ ءُ مرچی سی پیک دگ ٹوبڑو ءَ نشتگ ایں۔ واکدار مئے ایپ آئی آر ءَنبیسگ ءَ نہ اِنت۔
آئی ءَ گوشتگ کہ ما وتی پریس کانپریس ءِ پارست ءَ شمارا درساں وتی آھوکیں گامگیج ءِ باروا سرپد کن ایں کہ ما باندا نال ءَ تھتگ بند ھرتال ءِ جار ءَ جن ایں ءُ ھمے اوست ءَ دار ایں کہ باپار ءُ لس مردم مئے گون ءَ کمک کن اَنت ءُ وتی درسیں باپاری جاھاں بند کن اَنت ءُ مئے درداں شریدار بنت۔ اگاں مئے مردم داں باندا دیم ءَ آرگ نہ بوت اَنت مئے زھرشانی چہ اد ءَ روت ما وتی آھوکیں گامگیج ءَ ھزدار، شال کراچی شھدگ ءَ بند کن ایں۔
