![](https://zrumbesh.com/wp-content/uploads/2024/07/WhatsApp-Image-2024-07-06-at-08.43.28_2aee06e3-1-1024x595.jpg)
بلوچ یکجھتی کمیٹی ءِ سروک ڈاکٹر ماہ رنگ ءَ ماں چاگردی رسانکدر ایکس ءَ گریشگ ءَ پاکستانی لشکر ءِ زوراکیانی بگیری ءَ نبشتگ کہ من گریشگ ءَ بوتگیں ریاستی لشکر ءِ زورکیاں گوں ترندیں دانکاں ایر جن آں۔ مرچی سھب ءَ گریشگ ءِ ھند کوچو ءَ سی ٹی ڈی ءَ گسانی سر ءَ بیڑ برتگ ءُ بازیں مردم زور بیگواہ کرتگ اَنت ءُ جنیناں ھوار باز مردم ٹپی کرتگ اَنت۔
آئی ءَ گوشتگ کہ زوربیگواھیں مردمانی تہ ءَ شاہ جان ء سلیم، گوھردین ء ھیرجان، مھم جان ء لال بکش، میار ء لال بکش، مھمد آرپ ء ابدرھمان ءُ منیر ءِ سبزل ھوار اَنت۔ ٹپی بوتگیں مردمانی تہ ءَ زور بیگواھیں منیر ءِ پت ءُ مات ءَ ھوار بازیں مردم ھوار اَنت۔
ڈاکٹر ماہ رنگ ءَ گوشتگ کہ ریاستی لشکر ءَ گساں ساڑی ئیں دو پرپٹ، دو لک کلدار، ھشت موبائل ءُ دگہ گرانھادیں سامان برتگ اَنت ءُ تیرگواری کرتگ ءُ گسانی سولر سسٹم تباہ کرتگ اَنت۔
آئی ءَ گوشتگ کہ ریاستی لشکر ءِ اے زوراکیانی بگیری ءَ ھندی مردم ءُ بلوچ یکجھتی کمیٹی ءِ ھمبل ھواری ءَ زھرشانی ءَ نشتگ اَنت۔ من گوں مردمی ھکانی ادارھاں لوٹ کن آں کہ اے ویل ءِ باروا دلگوش ءَ گور بہ کن اَنت ءُ بلوچ اے ویل ءِ بگیری ءَ شریں وڑے ءَ توار چست بہ کن اَنت۔