شال: بلوچ یکجھتی کمیٹی ءِ سروک ڈاکٹر مھرنگ ءَ وتی درشانے ءَ گْوشتگ کہ بلوچ راج ، بلوچ چاگرد ءُ بلوچ سرڈگار ءِ سر ءَ دُرسیں کالونی پگر ءِ منوک ءُ پندل بازیں لوٹاں ودی بیتگیں وتسر ءِ وتگڑیں ٹک، بولک،دمگ، مزھب، زبان،جنین ءُ مردین، سیمسر، گل، ٹولی بازی ءِ سیت ءُ چہ بھر ءُ بانگی ءَ مستر ءُ تیوک ءَ بلوچ بہ بنت ءُ بلوچ راجی مچی ءَ 28 جولائی ءَ گوادر ءَ بھر بزور اَنت ءُ بلوچ بیگ ءِ منّانک پہ ھر بلوچ ءِ راجی لوٹ اِنت۔
آئی ءَ گْوشتگ کہ اگاں بلوچ ءُ بلوچ سرڈگار رکینگی اِنت گڑا بلوچ ءِ گْور ءَ نوں چِست بیگ،پاد آھگ ءُ پِڑ ءَ درکپگ ءَ ابید دگہ ھچ راہ پشت نہ کپتگ۔ مارا یک زندگیں راجے ءِ بستار ءَ ھم پَتّ بیگ ءُ سرجمیں جھان ءِ سرپد کنگ ءِ وھد اِنت کہ بلوچ نوں وتی سرڈگار ءِ سر ءَ چِد ءُ گیش وتی چُکچینی ءَ اوپار کُرت نہ کنت۔
ڈاکٹر مھرنگ ءَ گْوشتگ کہ بلوچ راجی مچی دُرسیں بھر ءُ بانگی پندلانی پُشت جنگ ءُ یک راجی ءِ بستار ءَ ھم پَتّ بیگ ءِ یک گْوستانکی ءُ گھتریں موھے۔ اے وھد ءِ زیان کنگ ءِ تاوان بلوچ راج ءَ بیت ءُ چہ وھد ءَ راجی ءُ مُچی نپ زورگ راجی ھستی ءِ مانزمان اِنت۔
