ھزدار: زورگریں پاکستانی لشکر ءِ دست ءَ آوار جنگ بوتگیں زور بیگواھیں آسپ ءُ رشید ءِ گھار سائرہ، سلمان ءِ گھار سادیہ ءُ آدگہ جنین چہ مردمانی گھگیری ءَ پد یل کنگ بوتگ اَنت۔
آیانی یل بوگ ءِ گپ بلوچ یکجھتی کمیٹی ءِ سروک ڈاکٹر ماہ رنگ راست کرتگ ءُ گوشتگ کہ مردمانی گھگیری زندگ بات، ھزدار ءَ چار ادار ءَ دزگیریں سائرہ، سادیہ ءُ آدگہ بلوچ جنین چہ ھزدار ءِ مردمانی گھگیری ءِ زور ءَ ریاستی لشکر ءِ بندیگی ءَ آجو بوتگ اَنت۔
آئی ءَ گوشتگ کہ ھزدار ءِ مردماں بازیں کچے ءَ پہ وتی گھارانی پھریزگ ءَ ریاستی گاڑیانی دیم ءَ داں چار ادار ءَ یکشل ءَ گھگیری کرتگ ءُ مردمانی گھگیری سوبمند بوتگ۔ ریاستی لشکر ءِ اے زوراکیانی بگیری ءَ ھزدار ءِ مردم بازیں کچے ءَ درکپتگ اَنت ءُ شال کراچی شھدگ بند اِش کرتگءُ لشکر ءِ اے رویشانی بگیری ءَ گامگیج زورگ ءِ لوٹ اِش کرتگ۔
ڈاکٹر ماہ رنگ ءَ گوشتگ کہ من گوں ھزدار ءِ مردماں لوٹ کن آں کہ گیش ءَ چہ گیش اے زھرشانی ءَ بھر بزور اَنت ءُچہ مردمانی زور ءَ اے نزام ءَ پروش بدے اَنت۔ مردمانی گھگیری ءُ مردمانی جھد زندگ بات۔
