سندھودیش روولیوشنری آرمی (ایس آر اے) ءِ جارکش سوڈو سندی ءَ ماں رسانکدر ءَ وتی شنگ کرتگیں درشانے ءَ گوشتگ کہ ایس آر اے جامشوروپولیس گس ءَ بمب ارش ءِ زمہ واری ءَ من ایت۔ ایشی پولیس سروگاناں ھوار درزنانی کچ ءَ پولیس کارمند ٹپی بوتگ اَنت ءُ باز گاڑی ءُ ماڑی ءَ سکا تاوان بوتگ۔
آئی ءَ گوشتگ کہ جامشورو پولیس گس ءُ آئی کارمند گوستگیں چنچو سال اِنت کہ سند ءَ دژمنیں پاکستان ریاستی چیریں ادارہ ءِ ھواری ءَ راجدروھی ءِ کرد ءَ پیلو کنگ ءَ اَنت ءُ گوں ریاستی ادارھانی ھواری ءَ راجدوستیں باسکانی بگیری ءَ لشکرکشیاں ھوار اَنت۔
جارکش ءَ گوشتگ کہ سند ءِ راجی مرکزسن ( جامشورو) ءِ تہ ءَ ودی بیوکیں سندی راھشون سائیں جی ایم سید ءِ سالروچ ءُ بیرانی روچ ءِ پروگراماں ھوار بیوکیں راجدوستیں باسکانی راھانی بندگ لٹ شاپ، دزگیری ءُ آیانی سر ءَ تیرگواری کنگ ءَ ریاستی ادارھانی ھواری ءَ راجدروھی ءِ کرد پیلو کرتگ۔ جامشورو ءِ وانگجاھاں سندی نودربر ءُ راجدوستیں کارکناں دلسیاہ کنگ ترسینگ، زوراکیانی نشانگ کنگءُ دزگیری کنگ ءُ زوریں بیگواھیاں ھوار اَنت۔
آئی ءَ گوشتگ کہ سند پولیس تیوک ءَ سی ٹی ڈی، لشکر ءُ آئی چیریں ادارھانی ھواری ءَ سند ءِ راجی زرمبشت ءِ بگیری ءَ بیوکیں لشکر کشیاں گوں اَنت۔ سند ءُ راجی زرمبشت ءِ بگیری ءَ یکشل ءَ دژمنی ءِ کرد ءَ پیلو کنگ ءَ اَنت۔
سوڈو سندی ءَ گوشتگ کہ ایس ار اے سند پولیس ءُ سی ٹی ڈی ءَ کڈن کنت کہ آ ریاستی ادارھانی پرمان ءِ رد ءَ چہ سند دژمنیں کاراں دزکش بہ بنت۔ اگاں نہ آیانی بگیری ءَ دگہ ترندیں ارش کنگ بیت۔ ایس آر اے داں سند ءِ سرجمیں آجوئی ءَ وتی گھگیری جھد ءِ برجاہ دارگ ءِ کول ءَ کنت۔
