تربت: زور بیگواھیں مردمانی کھولانی زھرشانی نندانک ءَ کیچ دمگدار ءِ کارگس ءِ دیم ءَ چار روچ سرجم بوتگ کہ انگت برجاہ اِنت۔ پہ ھمددری درشان کنگ ءَ چہ جتائیں جاھاں مردم پیداک اَنت۔
زھرشانی نندانک ءَ چہ بلیدہ ءَ زور بیگواھیں مسلم آرپ، پتہ میار، جان مھمدءِ کھول، تربت آپسر ءِ جاہ منند جھانزیب پزل، پیدارک ءِ جاہ منند میران ھسین، سمیر نیامت اللہ، شے کھن ءِ جاہ منند ڈاکٹر رپیک، نسار کریم، ھیات سبزل ءُ ولی مھمد ءِ کھول ساڑی بوتگ اَنت۔
زھرشانی نندا نک ءَ چہ زور بیگواھیں مردمانی کھولاں ابید بلوچ یکجھتی کمیٹی ، ھک بہ دے اِت زرمبشت ءُ جتائیں سیاسی ءُ چاگردی سروک ءُ باسک ساڑی بوتگ اَنت۔
سے شمبے ءِ روچ ءَ بی ایس او ءِ پیشیگیں سرکماش زریپ رند، ھک بہ دے اِت زرمبشت ءِ سروک ھاجی ناسر پلیزھی، مولانا نسیر اھمد، سئید جما، سادک پتہ، داد جان رند ءُ آدگہ مردم پہ ھمدردی درشان کنگ ءَ آتکگ اَنت۔
زھرشانی ءَ نشتگیں مردمانی لوٹ ھمیش اِنت کہ اگاں مئے مردم میاربار اَنت گڑا وتی جند ءِ آمیدگس ءَ بیار ءُ پیش اِش بہ کن ءُ آیانی میارباری ءَ مارا بہ گوش، اے وڑ ءَ زوریں بیگواھی ڈیھ ءِ راھبند ءُ کانود ءِ بگیری اِنت ایشی ما ھچ وڑ ءَ نہ من ایں پہ وتی زور بیگواھیں آزیزانی آجوئی ءَ جھد ءَ برجاہ دار ایں۔
