نامی ئیں بلوچ آجوئی لوٹوکیں راھشون استاد واھد کمبر ءَ پشتون ڈیھ دوستیں لچہ کار گلہ من وزیر ءِ شھیدی ءِ سر ءَ وتی درشان ءَ گْوشتگ نوک آبادی واک ءَ پہ وتی بدیں لوٹ ءُ واھگاں ورنائیں آشوبی لچہ کار گلہ من وزیر ءِ سر ءَ پہ آئی ءِ کشگ ءَ ارش کنائینگ ءَ پد آ پہ دارگ ءُ درمان ءَ چہ ڈیھ ءَ ڈن روگ ءَ داشتگ ، پہ وھد درمان نہ بیگ ءِ پد ءَ ورنائیں لچہ کار بیران بیتگ۔ آئی ءِ کوش ٹوھیں تاوانے ، چہ اے ھال ءِ اش کنگ ءَ ما دلپدرد ایں۔
آئی ءَ گْوشتگ گلہ من وزیر ءِ جانی تاوان ءِ سر ءَ من گوں سجھیں پشتون ءُ اوگان راجاں دلپدردی درشان کن آں۔ آ وتی ڈیھ ءُ راجدوستیں لچہ کاری ءُ لیکھی سیاست ءِ پد ءَ مدام یات کنگ بیت۔ پشتون ءُ چیردستیں راجانی ورنایاں آئی ءِ رندپداں روگ ءُ چیردستی ءِ بگیری ءَ وتی زْرمبشت دیم ءَ برگی اِنت۔
