پنجگور:پاکستانی لشکر ءِ دست ءَ زور بیگواھیں کمال ھان ءَ سی ٹی ڈی ءَ دروگیں میڑے ءَ کشتگ، کھول ءَ آئی ناھکیں کوش ءِ گپ راست کرتگ۔
کمال ھان ءِ نسیب گچک جوری ءِ جاہ منند اِنت کہ پاکستانی لشکر ءَ 15 اگست 2020 ءَ چہ آئی ءَ گس ءَ گوں دگہ باز مردمانی ھواری ءَ آوار جتگ ءُ زور بیگواہ کرتگ۔ آدگہ درسیں مردم جتائیں وھداں یل کنگ بوتگ اَنت۔
کمال ھان گوں دگہ سے زور بیگواھیں مردم ابدلکیوم زھری، ناسر پاروک ءُ گلام جان ءِ ھواری ءَ سی ٹی ڈی ءَ دروگیں میڑ ءَ کشتگ اَنت۔ آیانی لاش شال نادراھجاہ ءَ دیم دیگ بوتگ اَنت اود ءَ پجار نہ بوگ ءَ پد مستونگ ءِ ھند دشت ءِ تیرہ میل ءَ پجار نہ بوتگیں مردمانی مانشجاہ ءَ کبر کنگ بوتگ اَنت۔
یات بہ بہ اِت کہ ایشانی شھیدی ءِ باروا 30 اگست 2021 ءَ سی ٹی ڈی ءَ پہ ھزدار ءُ آواران دمگدار ءَ نمدی یے نبشتگ اَت کہ ناسر پاروک جاہ منند زھری سادک آباد، گلام جان ء باران جاہ منند بائی پاس شال، ابدالکیوم ء زھری ھان جاہ منند زھری ھزدار ءُ کمال ھان ء باھوٹ جاہ منند جکی آواران کشگ بوتگ اَنت ۔ آئی وتی نمدی ءَ کشگ بوتگیں مردم ناشرکار لیک اِتگ اَنت۔ آئی من اتگ کہ اے مردم بے کس لیکگ ءُ کبر کنگ بوتگ اَنت۔
جون 2023 ءَ زور بیگواھیں ابدالکیوم ءُ ناسر پاروک پجارگ بوتگ اَنت ءُ آ وھد ءَکمال ھان پجارگ نہ بوتگ۔ چی ءَ کہ کمال ءِ کھول پھوال اِنت ءُ آ کوہ ءِجاہ اَنت، کمال ھان ءِ کسانی ءَ آئی پت بیران بوتگ ءُ پت ءَ پجار کارڈ بہ بوتگ آئی پجار کارڈ ناکو ءِ نام ءِ سر ءَ بزاں کمال ھان ء باھوٹ کنگ بوتگ۔
پہ آئی آجوئی ءِ لوٹ ءَ کھول ءِ درشان زرمبش ءِ نیمگ ءَ چارشمبے، 10 جولائی 2024 ءَ شنگ کنگ بوتگ اَت چہ ھمے درشان ءَ پٹ ءُ پول کنگ بوتگ اَت ءُ زور بیگواھیں کمال ءِ ناھکیں کوش راست کنگ بوتگ۔ سی ٹی ڈی ءِ نمدی ءُ آئی پجار کارڈ دیم پہ کنگ بوتگ اَنت گڑا کمال ءِ ناھکیں کوش راست کنگ بوتگ ءُ کھول ءَ ھم آئی شھیدی من اتگ۔
کھول ءَ گوں بلوچستان سرکار ءَ لوٹ کرتگ ءُ گوشتگ کہ کمال بے میار اِنت سی ٹی ڈی ءَ ناھک ءَ دروگیں میڑ ءَ کشتگ، مارا کمال ءِ میارباری کوشگ بہ بیتءُ آئی گڈی اوبجاہ پیش دارگ بہ بیت دانکہ ما بزانیں مئے زھگ ءِ کبر ایش اِنت ما ھمک وھد ءَ پہ آئی کبر ءَ دوا لوٹگ ءَ شت بہ کن ایں۔
آئی ءَ گوں مردمی ھکانی ادارہ ءُ بلوچ راج ءَ لوٹ کرتگ ءُ گوشتگ کہ پہ کمال ءِ میارباری ءِ گوشگ ءُ آئی گڈی وابجاہ ءِ پیش دارگ ءَ مئے گون ءَ کمک بہ کن اِنت۔
کمال ھان ءِ کھول گچک جوری ءَ نشتگ ءُ آ کوھی دمگے کہ اود ءَمالداری کن اَنت ۔ اود ءَ دامگ ءُ دگہ ھچ وڑیں آسراتی نیست۔
