بلوچ یکجھتی کمیٹی ءَ ماں رسانکدرءَ وتی شنگ کرتگیں درشانے ءَ گوشتگ کہ شال ءَ زھرشانی کنوکانی سر ءَ رسترانی وڑ ءَ بیڑ برگ لس مردمانی زھرشانی ءِ بگیری ءَ ریاست ءِ زوراکی ءِ رویشت ءَ پیش دار ایت۔ اے ریاست ءَ مردمان ءَپہ وتی بیگواھیں آزیزاں پر ایمنیں زھرشانی کنگ ءِ موکل نیست۔ زھیر اھمد ءَ 27جون ءَ لشکر ءَ زور بیگواہ کرتگ زھیر یک سرکاری نوکرے انگت ءَ آئی باروا کھول ءَ ھچ وڑیں سرپدی دیگ ءَ نہ اَنت۔
آئی ءَ گوشتگ کہ زھیر اھمد ءِ کھول پہ آئی زندگی ءَ سکا ترسگ ءَ اِنت چی ءَ کہ تھی کارانی وزیر ءَ انوں وتی پریس کانپریس ءَ من اتگ اَت ءُ ابید ءِ گواہ ءَ پر ایمنیں زھرشانی کنوک ناشرکار لیک اتگ اَنت ءُ زھیر اھمد ءِ باروا رسانکدر ءَ ردیں گپ جتگ۔
آئی ءَ گوشتگ کہ بلوچ چکچینی ءُ پرایمنیں بلوچ جنین ءُ زھگانی سر ءَ ناھکیں زور ءِ کارمرز کنگ ءِ بگیری مئے سر ءَ پرز بیت کہ ما مردمانی گھگیری ءِ پارست ءَ وتی دیمپانی ءَ بہ کن ایں۔ اے درچ ءَ بی وائی سی بلوچ راجی مچی یے برجم دارگ ءَ اِنت۔
آئی ءَ گوشتگ کہ بی وائی سی کیچ ھنکین ءِ نیمگ ءَ بلوچ راجی مچی ءِ چن ءُ لانچ ءِ درچ ءَ تمپ، کونشکلات، ملک آباد، نزر آباد، آسیا آباد، رود بن، ناسر آباد، ھوت آباد، بالیچہ ءُ شاپک ءَ دیوان برجم دارگ بوتگ اَنت۔ بی وائی سی کراچی ھنکین ءَ کراچی ءِ شراپی گوٹ ءَ دیوان برجم داشتگ۔
