بلوچ راجی سروک ءُ بلوچ راجی زرمبشت ( بی این ایم ) ءِ پیشیگیں سرکماش ھلیل بلوچ ءَ ماں چاگردی رسانکدر ایکس ءَ شال ءَ زھرشانی کنوکانی سر ءَ پولیس ءِ بیڑ برگ ءُ زوراکیانی پژدر ءَ نبشتگ کہ بلوچ زھرشانی کنوکانی پر ایمنیں روانک ءِ سر ءَ پاکستانی لشکر ءَ ارش کرتگ ءُ یکبرے پد ءَ پیش داشتگ کہ ایردست ءَ گریوگ ءِ موکل ھم نیست ءُ ایردست بس درد اوپار بہ کنت ءُ ایشی وتی تالِہ سرپد بہ بیت۔
آئی ءَ گوشتگ کہ سَک جانیں بلوچ نوں مھکم اِنت کہ اگاں زار، پریات کنگ مئے تالِہ جوڑ کنگ بوتگ گڑا اے تالہ ءَ گوں مھمکمی پہ آجوئی ءَ مٹ کن ایں ءُ جھد ءَ برجاہ دار ایں ءُ ھواری ءَ دیم پہ منزل ءَ جنز ایں۔
ھلیل ءَ گوشتگ کہ مرچی بلوچ جنینانی سر ءَ ارش نہ تیوک ءَ مردمی ھکانی لگتمالی اِنت بلکیں رستری گامگیجے کہ پر ایمنیں جھد ءِ دارگ ءِ جُھد اِنت۔ پاکستانی لشکر ءِ دست ءَ زور بیگواھیانی بگیری ءَ توار چست کنوکیں مردمانی سر ءَ زوراکی وتی بیر ءِ توم ءَ وت رودین ایت۔ بلوچ ھمے رستری زوراکیانی بیر ءَ آجوئی ءِ دروشم ءَ گیپت، اے مئے ایمان اِنت۔
آئی ءَ گوشتگ کہ پاکستان ءِ اے زوراکی نہ تیوک ءَ ایرجنگی اِنت بلکیں میان استمانی تک ءِ زرد ءِ جکسینگ اِنت۔ بلوچ ءِ بگیری ءَ پاکستانی ریاست ءُ آئی لشکر ءِ زوراکی پہ مردمگری ءِ بگیری ءَ میارباری یے زانگ بیت۔
ھلیل ءَ گوشتگ کہ بلوچ جنینانی توان ءُ مھکمی ءَ دْروت ندر کناں کناں کہ آیاں باز جنجالانی دیمپانی کنگ ءَ ابید وتی جھد برجاہ داشتگ۔ مئے مات ءُ گھارانی توانمندی نہ تیوک ءَ بلوچ بلکیں پہ سرجمیں جھان ءِ نزوریناں پہ وتی ھکاں مڑگ ءِ سکین ءَ دنت۔آیانی توان ءُ مھکمی ھمے چیز ءَ پیش دار ایت کہ پہ وتی ھکانی پَد جنگ ءَ مردم ءَ ھچ وڑیں زوراکی داشت نہ کنت۔ وھد ھمیش اِنت کہ میان استمانی تک اے جیڑہ ءِ سر ءَ دلگوش گور بہ کنت ءُ پاکستانی ریاست ءَ مردمگری ءِ بگیری ءَ میارباری ءَ آمیدگس ءَ بیار ایت ءُ جست بہ کنت۔
