بلوچ راجی زرمبشت ( بی این ایم ) ءِ پیشیگیں سرکماش ھلیل بلوچ ءَ ماں چاگردی رسانکدر ایکس ءَ پشتون آشوبی شائر گیلامن وزیر ءِ کوش ءِ پژدر ءَ نبشتگ کہ گیلامن وزیر یک مزن نامیں مردم، یک آشوبی شائر ءُ مردمی ھکانی نہ ترسیں کارکنے اَت کہ آئی توار پہ زوراکی ءُ ناھکیانی بگیری ءَ برز اَت۔ آئی شائری ءَ مردم یکجاہ کرتگ اَنت ءُ نزور توار جتگ اَنت۔ بژنیگیں وڑے ءَ اسلام آباد ءَ پاکستانی لشکر ءِ دست ءَ آئی زندگی ھلاس کنگ بوت۔ چہ ایشی ءَ آئی توانمندیں توار پہ مدامی بے توار بوت۔
آئی ءَ گوشتگ کہ بلوچ ءِ بستار ءَ من اے رستری ءَ گوں ترندیں دانکاں ایر جن آں۔ گیلامن وزیر ءِ کوش نہ تیوک ءَ پہ پشتون راج ءَ تاوانے بلکیں مئے درسانی درد ءُ دژمن یکے۔ اے زوراکی ءَ مئے دلانی تہ ءَگمانی یک نوکیں درے پچ کرتگ۔ ما اے گرانیں ساھتاں گوں پشتوناں ھمسنتی ءَ اوشتاتگ ایں، اے درد ءَ شریدار ایں ءُ اے ویل ءِ تاوان ءَ پرسیگ ایں۔
ھلیل بلوچ ءَ گوشتگ کہ پشتوناں یکے دومی ءِ بگیری ءُ ھمے لیکہ ءَ بھر ءُ بانگ بوگی نہ اِنت، چہ ایشی ءَ ابید آیاں وتی مزنیں دژمن زانگ لوٹ ایت ءُ پہ وتی سرڈگار ءَ یک ھمگرنیں مولے ءِ نیمگ ءَ یکجاہ بوگ لوٹ ایت۔
