بلوچ یکجھتی کمیٹی ءِ سروک ڈاکٹر ماہ رنگ ءَ ماں رسانکدر ایکس ءَ وتی تامربندے شنگ کرتگ ءُ آئی سر ءَ نبشتگ کہ اے وھد ءَ بازیں بلوچ جنین سول لائن ءَ بندیگجاہ ءَ بند اِنت۔ چہ آیاں باز جنین ءِ جاور چہ لٹ شاپ ءِ سوب ءَ ناگیگ اَنت بلے شال پولیس وتی کینگ ءِ درسیں سیمسراں گواز کنگ ءَ اِنت۔ نہ اے جنیناں مارا پیش دار ایت ءُ نہ آیاں پہ درمان کنگ ءَ نادراھجاہ ءَ دیم دنت۔ نوں ھمے ھال پیداک اِنت کہ اے جنیناں کینٹ بندیگجاہ ءَ دیم دیگ ءَ اِنت۔
آئی ءَ گوشتگ کہ اے ریاست، بلوچستان سرکار ءُ شال پولیس ءَ کمیں سما نیست کہ آ چے کنگ ءَ اَنت۔ بلوچ چاگرد ءَ بلوچ جنینانی گون ءَ اے وڑ پیش بوگ ءِ آسر چے کہ بہ بیت ایشی زمہ وار ریاست اِنت۔
ڈاکٹر ماہ رنگ گوشتگ کہ من گوں شال ءِ درسیں مردماں دزبندی کن آں کہ پہ وتی گھارانی پھریزگ ءَ اے جھد ءَ کمک بہ کن اَنتءُ سریاب دگ ءَ نندانک ءَ ھوار بہ بنت۔ اگاں جنیناں ھوار درسیں زھرشانی کنوکیں مردم یل کنگ نہ بوت اَنت ما ریڈ زون ءَ زھرشانی ءَ نند ایں۔
