شال: پاکستانی لشکر ءِ دست ءَ زور بیگواہ کنگ بوتگیں زھیر اھمد ءِ کھول ءِ زھرشانی روانک ءِ سر ءَ پولیس ءَ بیڑ برتگ ءُ زھرشانی کنوکانی سر ءَ تیرگواری کرتگ ءُ چمی گیس جتگ ءُ مردم لٹ شاپ کرتگ اَنت۔
پولیس ءِ لٹ شاپ ءِ آسر ءَ بازیں مردم ٹپی بوتگ اَنت۔ ٹپی بوتگیں مردمانی تہ ءَ جنین ءُ زھگ ھم ھوار اَنت۔ پولیس ءَ باز مردم دزگیر کرتگ ءُ برتگ اَنت۔
زھرشانی روانک ءَ ھواریں بیبرگ بلوچ ءَ وتی تامربندے ءَ گوشتگ کہ مئے زھرشانی روانک ریڈ زون ءِ نیمگ ءَ روگ ءَ بوتگ ما پر ایمنیں بوتگ ایں سریاب دگ ءَ اتا چار راہ ءَ پولیس ءَمارا داشتگ ءُ مئے جنین لٹ شاپ کرتگ اَنت ءُ تیرگواری کرتگ۔ مئے لھتے ھمبل ٹپی بوتگ ما نزانیں آ چون اَنت۔ من وت ھم ٹپی آں۔
آئی ءَ گوشتگ کہ ما پولیس ءِ ناشریاں نہ من ایں، آ ھمے سرپد بیت کہ ما آئی زوراکیانی دیم ءَ نزوریں بہ ایں ، ما آئی ءَ ھمے گوش ایں کہ تو چنچو زوراکی بہ کن ما نزور نہ بہ ایں ءُ وتی زھرشانی ءَ برجاہ دار ایں۔
