پنجگور: اگست 2020 ءَ چہ گچک ءَ پاکستانی لشکر ءِ دست ءَ زور بیگواہ کنگ بوتگیں ورنا کمال ءِ کھول ءَ پہ آئی آجوئی ءَ توار چست کنگ ءِلوٹ کرتگ۔
کھول ءِگوشگ اِنت کہ کمال ء مھمد نسیب گچک جوی ءِ جاہ منند اِنت پاکستانی لشکرءَ 15 اگست 2020 ءَ چہ گس ءَ گوں دگہ بازیں مردمانی ھواری ءَ آوار جتگ ءُ بیگواہ کرتگ۔ آدگہ درسیں مردم جتائیں وھداں یل کنگ بوتگ اَنت بلے کمال انگت بیگواہ اِنت۔
آئی ءَ گوشتگ کہ کمال یک شپانکے آئی ءَ گوں ھچ وڑیں چست ءُ ایراں کار نہ بوتگ ءُ بے میار اِنت۔ چہ آئی زوریں بیگواھی ءَ تیوگیں کھول رنجانی دیمپان اِنت۔ اگاں آئی ءِ سرءَ چونیں بھتامے ھست گڑا آمیدگس ءَ پیش کنگ بہ بیت ، اگاں بے میار اِنت گڑا زوت یل کنگ بہ بیت۔
کھول ءَ گوں مردمی ھکانی ادارہ ءُ بلوچ راج ءَ لوٹ کرتگ کہ پہ کمال ءِ آجوئی ءَ توار چست بہ کن اَنت۔
