![](https://zrumbesh.com/wp-content/uploads/2024/07/WhatsApp-Image-2024-07-07-at-02.58.57_9064a555-1024x576.jpg)
شال: پہ زور بیگواھیں مردمانی پدجنگ ءَ شدکشیں زھرشانی گدان ءَ شال پریس کلب ءِ دیم ءَ 5503 روچ سرجم بوتگ۔
مرچی چہ ماشکیل ءَ بی این پی ءِ کارکن ابدالبسیر، الاھی بکش، مھمد آسپ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ اے جھان ءَ بے کساس مردم ودی بوتگ اَنت آ ھمک روچ مرگ ءِ ارجان بنت، بلے گرانکدر اَنت ھما مردم کہ پہ دومی ءَ وتی زندگیاں ببا دے اَنت، پہ ھمے اوست ءَ مرگ ءَ ھمباز کن اَنت کہ اچما پد آھوکیں پدریچءَ مئے دیمونیانی مز بہ رس ایت۔ اگاں ما اے دیمونیاں بہ چار ایں گڑا مارا بلوچ سرڈگار ءِ سر ءَھزارانی کچ ءَ شھید دست کپ ایت، ھزارانی کچ ءَ پیر، ورنا، زھگ ءُ جنین شھید بوتگ اَنت۔
ماما کدیر گوشتگ کہ مرچی ھم ھزارانی کچ ءَ بلوچ پسگ آوار جنی ءَ پد بیگواہ اِنت ءُ چون چونیں آزاراں اوپار کنگ ءَ اَنت۔ ھما مات چون بنت آ زان اَنت کہ مئے زھگ زنداناں بندیگ اَنت۔ آیاں دزی ھم نہ کرتگ ءُ نہ کسے ءِ گس اش پروشتگ، آ پما زنداناں بندیگ اَنت۔
آئی ءَ گوشتگ کہ چونیں ھم چاریگے ابید ءِ زرا ھچ کرت نہ کنت ءُ پہ زرا آ ھرچیز کنت۔ کسے گوں آئیءَ مرگ ءِ سودا ءَ جنت، کسے گیرت، کسے پہ ماتیں سرڈگار ءِ سوداگری ءِ زران ناماں اِنت۔ ما ھما وھد ءَ آیاں پجہ کار ایں کہ ما چاریگ ءِ گوستانک ءَ وان ایں۔