بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں ھزدار ءُ مشکے ءَ زورگریں پاکستانی لشکر ءِ پانگسانی سر ءَ اُرش کُرتگ ءُ چار کارمند کُشتگ۔
آئی ءَ گوشتگ کہ شش جولائی ءَ بیگاہ ءِ پنچ ءَ سرمچاراں بنڈوکی مشکے ءَ برجاھیں زورگریں لشکر ءِ پانگس ءِ سر ءَ گوں ٹوھین ءُ نوکیں سلاھاں اُرش کُرتگ، اُرش داں یک ساھتے ءَ برجاہ بیتگ، اُرش ءَ لشکر ءِ سَے کارمند مُرتگ ءُ باز ٹپی بیتگ۔
جارکش ءَ گوشتگ کہ دومی اُرش شش جولائی ءِ شپ ءِ یازدہ ءَ سرمچاراں ھزدار ءِ ھند سریج گریشگ ءَ برجاھیں زورگریں پاکستانی لشکر ءِ پانگس گوں نوکین ءُ وتکاریں سلاھاں نشانگ کُرتگ، اُرش ءَ زورگریں لشکر ءِ یک کارمندے جاھی مُرتگ۔
میجر گھرام ءَ اُرشانی زمہ واری منّ اتگ ءُ گوشتگ کہ داں سرڈگار ءِ آجوئی ءَ زورگریں لشکر ءِ سر ءَ اُرش گوں تُرندی ءَ برجاہ بنت۔
