آواران: نومبر 2023 ءَ چہ پیراندر آواران ءَ زورگریں پاکستانی لشکر ءِ دست ءَ زور بیگواہ کنگ بوتگیں ورنا اکتر ء ساھبداد ءِ کھول ءَ پہ آئی آجوئی ءَ توار چست کنگ ءِ لوٹ کرتگ۔
کھول ءَ گوشتگ کہ اکتر ء ساھبداد لوپ پیراندر ءِ جاہ منند اِنت کہ 29 نومبر 2023 ءِ شپ ءَ پاکستانی لشکر ءُ چیریں ادارھانی کارمنداں میردوست بازار پیراندر ءَ بیڑ برتگ ءُ آوار جتگ ءُ بیگواہ کرتگ انگت بیگواہ اِنت۔
کھول ءَ گوشتگ کہ اکتر ءِ زوریں بیگواھی ءَ ھپت ماہ گوستگ انگت ءَ آئی ھچ وڑیں ھال نیست کہ چون ءُ کج ءَ اِنت۔ چہ اکتر ءِ زوریں بیگواھی ءَ مئے تیوگیں کھول سکس رنجانی دیمپان اِنت۔
آئی ءَ گوشتگ کہ اکتر یک بےمیاریں ورنایے آئی ریاست ءِ بگیری ءَ ھچ وڑیں کار نہ کرتگ۔ اگاں اکتر ءِ سر ءَ چونیں بھتام ھست گڑا سرکاری آمیدگس ءَ پیش کنگ ءُ مارا آئی میارباری گوشگ بہ بیت۔
زور بیگواھیں اکتر ساھبداد ءِ کھول ءَ گوں بلوچ راج ءُ مردمی ھکانی ادارھاں لوٹ کرتگ کہ پہ اکتر ءِ آجوئی ءَ توار چست بہ کن اِت۔
