بلوچ راجی زرمبشت ( بی این ایم ) ءِ بنجاھی جارکش ءَ ڈاکٹر مھمد الی ءِ اناگتی بیرانی ءَ دلپدردی درشان کرتگ ءُ پہ پارٹی ءُ راجی زرمبشت ءَ آئی ءِ گرانبھائیں جُھد ءُ راجدوستی دروت ندر کرتگ۔ ڈاکٹر مھمد الی یک گرانکدر ” چیریں بامردے” ءِ پیم ءَ بلوچ راجی آجوئی جھد ءَ بے دروریں کار کرتگ ءُ ھمے پیش داشتگ کہ پیش دارگ ءَ ابید کجام وڑءَ راجی زرمبشت ءَ کمک کنگ ءِ کرد پیلو کنگ بیت۔
جارکش ءَ گوشتگ کہ ڈاکٹر مھمد الی، تربت شاپک ءِ جاہ منند اِنت ءُ یک راجدوست، آجوئی لوٹوک ءُ سکیں مھکمیں مردمے بیتگ۔ آراجی زرمبشت ءِ سر ءَ نہ تیوک ءَ دلجم بوتگ بلکیں آئی وتی کھول ءِ آدگہ مردمان ءَ راجی زرمبشت ءَ ھوار بوگ ءِ سکین داتگ۔ ھمے سوب ءَ آئی کھول ءِ بازیں ورنا جتائیں پِڑانی سر ءَ کار ءَ اَنت۔ ڈاکٹر مھمد الی ءِ کھول ءِ باز ورنا پہ راجی آجوئی زرمبشت ءَ شھید بوتگ کہ آیانی تہ ءَ شھید زھیر جان، شھید آمرھان، شھید پدائی جمال، شھید شاہ میر، شھید دولت ءُ شھید ایوب۔
آئی ءَ گوشتگ کہ ڈاکٹر مھمد الی یک گیرتمند ءُ شرپمندیں بلوچے ءِ وڑ ءَ وتی زند گوازینتگ۔ میڈیکل ڈگری ءَ ھوار آئی سروس کمیشن ءَ پولیس سروگانی ءِ چکاس ءَ سوبین بیتگ ءُ ڈی ایس پی ءِ اگدہ ءِ سر ءَ بوتگ۔ یک پولیس سروگانی ءَ ابید آئی ھمے وھد ءِ پاکستان ءِ مزن وزیر یوسپ رزا گیلانی ءِ گوادر ءَ آھگ ءِ میان ءَ دْروت ندر کنگ ءِ دیوان ءَ بھر نہ زرتگ۔ اے وڑیں گامگیج آئی راجدوستی ءُ راجی زانشت ءَ تچکی ءَ پدر کنت کہ ایشی آسر ءَ آئی وتی کار یل داتگ، بزاں کہ آئی ءَ مدام گوشگ بوتگ کہ آ چہ یک وزیرے ءِ کر ءَ سپارش ءَ بہ کنائین ایت زورگ بیت، بلے اے چیز آئی ءَ پہ وت دوست نہ بوتگ۔
جارکش ءَ گوشتگ کہ ڈاکٹرمھمد الی یک رژن پگر ءُ باسمائیں مردمے بوتگ۔ آئی ” چاوش بلوچ ” نام ءَ دو گچینی کتاب ” پارلیمانی سیاست اور بلوچ جہد آزادی” ءُ ” بلوچ جہد آزادی، کامیابیاں اور نئی حکمت عملیاں” نبشتہ کرتگ اَنت۔ اے نبشتانک آئی لیکھی بودشت ءُ راجی سدکی ءَ پدر کن اَنت، چہ ایشی ءَ ابید سدانی کچ ءَ جتائیں نبشتانک جتائیں ند ناماں نبشتہ کرتگ۔ ڈاکٹر مھمد الی بے مالی ءَ ابید مدام پارٹی ءُ آدگہ گلانی کمک کرتگ ءُ چہ وتی جھد ءِ زراں بلوچ شھیدانی بازیں کھول کمک کرتگ انت۔
بی این ایم ڈاکٹر مھمد الی دیمونی ءُ کاراں من ایت ءُ آئی اناگتی بیرانی ءَ گوں آئی کھول ءِ گمان یکچ ءَ شریدار اِنت۔ ما آئی دیمونیاں ھچبر بے ھال نہ کن ایں ءُ آئی یات مئے دلانی تہ ءَ مدام ابدمان بنت۔
