![](https://zrumbesh.com/wp-content/uploads/2024/06/1000379679-1024x576.jpg)
بلوچ راجی زرمبشت ( بی این ایم ) ءِ شھید راشد مشکے آواران ھنکین ءِ نیمگءَ پارٹی ءِ بیگواھیں رھشون ڈاکٹر دین مھمد زوریں بیگواھی ءِ پانزہ سال سرجم بوگ ءَ دیوانے چہ ھنکین ءِ کماش مھران ءِ سروکی ءَ برجم دارگ بوتگ۔ دیوان ءِ گچینی مھمان بی این ایم ءِ گھبودی کارگشاد اکبال بلوچ ءُ دیوان ءِ برجم داروکیں ھنکین ءِکمک سرکماش تلار بوتگ اَنت۔ اے دیوان ءَ پارٹی ءِ باسکاں بازیں کچے ءَ بھر زرتگ۔
ھنکین ءِ سرکماش مھران ءَ گوشتگ کہ ڈاکٹر دین مھمد یک مھکمیں لیکھے ءِ واھند ءُ چہ وتن ءِ درداں آشنائیں سروکے آئی وتی سیاست چہ نودربری ءِ زمانگ ءَ بی ایس او ءِ راھبند ءَ بندات کرتگ۔آئی ءَ ورنایان ءَ سیاسی ھیلکاری دیگ ءَ پد پارٹی ءِ تہ ءَ پہ بلوچ راجی آجوئی ءَ راج ءِ یکجاہ کنگ ءَ وتی زند ببا داتگ۔
آئی ءَ گوشتگ کہ ڈاکٹر دین مھمد یک لس ڈاکٹرے نہ بوتگ بلکیں مردمانی راھشونی ءَ ابید آئی مردم چارتگ اَنت ءُ درمان کرتگ اَنت۔ آئی ءَگوشتگ کہ گواچنیں نادراھی راجی ایردستی اِنت، زورگپتی اِنت، نوک آبادکاریں نزام اِنت،چہ ایشی ھلاس کنگ ءَ ابید ما یک زندگیں راجے بوت نہ کن ایں۔
دیوان ءِ گچینی مھمان بنجاھی گھبودی کارگشاد اکبال ءَ گوشتگ کہ پارٹی ءِ باسکانی اے جاورانی تہ ءَ کار کنگ، دیوان برجم دارگ ھمے پدر کنت کہ ما دیم ءَ جنزگ ءَ ایں،پمیشکا کہ مئے پارٹی ءِ ھمک باسک ءَ ھمے مارشت بوتگ کہ اے شھیدانی پارٹی اِنت، سیاسی بندیگانی پارٹی اِنت ءُ جھد ءِ میان ءَ سوبمندی شھیدانی ھونانی برورد اِنت۔
آئی ءَ گوشتگ کہ ڈاکٹر دین مھمد ءِ دراجکشیں زوریں بیگواھی ھمے گپ ءِ منانک اِنت کہ ڈاکٹر دین مھمدءِ وتن ءُ راج ءِ گون ءَ سیادی چنچو مھکم بوتگ ءُ اے سیادی ءِ نھاد ءَدژمن ءِ زندان ءِ تہ ءَ اوپار کنگ ءُ پیلو کنگ ءَ اِنت۔
اکبال ءَ گوشتگ کہ ھپتاد ءِ دھک ءَ مشکے ءُ جاؤ ءِ میان ءَدومگ ءِ کوہ ءَ پاکستانی لشکر ءَ اتا سمالانی، نیٹو، بی بی سومری ءُ پیراڑی ءَ ھوار 13 بلوچ شھید کرتگ، آ وھد ءَ پاکستانی لشکر ءَ ھمے جار جتگ کہ اے ھند نوں سرمچار ودی نہ کنت، بلے ڈاکٹر دین مھمد ءُ ڈاکٹر منان جان بی این ایم ءِ راھبند ءِ رد ءَھمے ھنداں تر ءُ گرد کرتگ ءُ شھیدانی کھولانی گون ءَگند ءُ نند کرتگ۔ شھید استاد الی جان ءِ گونءَ ھواری ءَ راجی سیاست ءِ ھیلکاری ءِ درچ بندات کرتگ، ایشی آسر مرچی مئے دیم ءَ اَنت اے ھند راجی زرمبشت ءِ گچینی جنگجاہ جوڑ بوتگ اَنت۔