![](https://zrumbesh.com/wp-content/uploads/2024/06/WhatsApp-Image-2024-06-29-at-03.09.19_3fdb3b1d-1024x614.jpg)
کراچی: کراچی زانشتجاہ ءِ نودربراں پہ زور بیگواھیں نودربر بھادر ءِآجوئی ءَ پریس کانپریس کرتگ ءُ گوشتگ کہ بلوچستان ءَ روچ پہ روچ ءَ زوریں بیگواھی گیش بوگ ءَ اِنت۔ درساں گیش بلوچ نودربر زوریں بیگواھی ءِ نشانگ بوگ ءَ اَنت۔ چوشیں روچے نہ گوز ایت کہ نودربر زانشتجاھانی تہ ءَ ترسینگ نہ بنت، چہ وابجاھاں روچ ء رھمان ءَ پاکستانی لشکر نودربراں آوار جنت ءُ بیگواہ کنت۔ پاکستان ءِ راھبند ءُ اکوام متھدہ ءِ کنونشن ءَ اے گپ تچک کرتگ کہ شھرمنندانی پھریزگ ءِ زمہ واری ریاست ءِ سر ءَ اِنت۔ پاکستان ءِ کسان ءُ مزنیں درسیں آمیدگساں ھمے پرمان دیگ بوتگ کہ مردماں زور بیگواہ مکن اِت بلکیں پہ دزگیری ءَ کانود ءِ لوٹ پیلو کنگ بہ بنت۔ بلے بلوچستان ءَ میان ستمانی ءُ پاکستان ءِ راھبند لپاشگ بوگ ءَ اَنت۔
آئی ءَ گوشتگ کہ بلوچستان ءَ چوشیں باز ویل دیم ءَ آتکگ اَنت یک مردمے باز براں زور بیگواہ کنگ بوتگ۔ مارا بازیں اے وڑیں کیس رستگ کہ ورنا چہ سال ءُ ماھاں زوریں بیگواھی ءَ پد آجو بوتگ اَنت آ سسائی نادراہ بوتگ ءُ چوشیں ھم کیس ھست کہ زور بیگواھیں مردماں یل بوگ ءَ پد وتکشی کرتگ۔ھما کھولانی آزیز بیگواہ اَنت آ ھم سسائی نادراہ اَنت۔ بلوچستان ءَ پہ اے وڑیں جھدانی ھلاس کنگ ءَ ریاست زوریں بیگواھی ءَ چو سلاہ ءِ وڑ ءَ کارمرز کنگ ءَ اِنت۔ انوں ھم سی ٹی ڈی ءِ وڑیں ادارھاں زور بیگواھیں بلوچ دروگیں میڑاں کشتگ اَنت۔ ھمے سوب ءَ زور بیگواھیں مردمانی کھول سکا جنجال اِنت۔
آئی ءَ گوشتگ کہ نودربرانی زوریں بیگواھی نہ تیوک ءَآیانی باندات ءِ تباہ کنگ اِنت بلکیں بلوچستان ءَ چوشیں روچ نہ گوز ایت کہ بلوچ نودربر ترسینگ نہ بنت، بلوچ نودربر مدام زور بیگواہ کنگ بوگ ءَ اَنت۔ بلوچستان زانشتجاہ ءِ نودربر سھیل ءُ پسی انگت بیگواہ اَنت۔ سھیل ءُ پسی 2021 ءَ چہ بلوچستان زانشتجاہ ءَ آوار جنگ بوتگ اَنت ءُ بلوچستان ءِ درسیں نودربر گلاں زھرشانی کرتگ ءُ بلوچستان زانشتجاہ داں چنچو ماہ ءَ بند بوتگ بلے آ چہ چیریں آزارجاھاں آجو نہ بوتگ اَنت۔
آئی ءَ گوشتگ کہ چہ راولپنڈی ایگریکلچر زانشتجاہ ءَ پیروز 2022 ءَ آوار جنگ بوتگ آ انگت بیگواہ اِنت، چہ تربت زانشجاہ ءَ نئیم رھمت 2022 ءَ زور بیگواہ کنگ بوتگ انگت بیگواہ اِنت۔ انیس ھزدار ءِ جاہ منند ءُ بھاالدین زانشتجاہ ءَ گریجویٹ کرتگ، آ چا رجون ءَ زور بیگواہ کنگ بوتگ انگت بیگواہ اِنت۔ آ سی ٹی ڈی ءِ دست ءَ دیگ بوتگ بلے آئی سر ءَ دروگیں بھتام جنگ بوتگ ھمے سوب ءَ آئی کھول ءَ ھوار ما ترسگ ءَ ایں ایشی ءَ چو آدگہ بلوچانی وڑ ءَ دروگیں میڑے ءَ مہ کش ایت۔ بلوچستان ءَ سدانی کچ ءَ نودربر چہ سالاں بیگواہ اَنت۔ نودربرانی زوریں بیگواھی ءِ درچ یکشل ءَ برجاہ اِنت۔ چہ گوادر ءِ ھند پسنی ءَ کراچی زانشتجاہ ءِ پلسپہ ءِ نودربر بھادر ء بشیر اھمد 23 جون 2024 ءَ پاکستانی لشکر ءَ زور بیگواہ کرتگ۔ بھادر بشیر کراچی زانشتجاہ ءِ نودربر اِنت کہ آئید ءَ موکلاں وتی گس ءَپسنی ءَ آتکگ۔ 24 جون ءَ بھادر ءِ کھول ءَ پسنی ءَ زھرشانی کرتگ ءُ پسنی زیروپوائنٹ ءَ مکران شھدگ داں باز اداراں بند کرتگ۔ رند ءَ واکدار ءَ دلجمی داتگ کہ یک روچے ءَ پد بھادر پہ سلامتی آجو بیت بلے چار روچ ءِ گوزگ ءَ پد بھادر آجو نہ بوتگ۔ بیست ءُ شش جون ءَ بھادر ءِ کھول مکران شھدگ ءَ زھرشانی ءَ نشتگ لشکر ءَ آئی کھول لٹ شاپ کنگ بوتگءُ آیاں یکشل ءَ ترسینگ ءَ اَنت۔
آئی ءَ گوشتگ کہ ما کراچی ءِ بلوچ نودربر گوں بھادر ءِ کھول ءَ یکجھتی کنگ ءَ آتکگ ایں ءُ ما ھمے لوٹ ءَ کن ایں کہ کراچی زانشتجاہءِنودربرر بھادر ءِ بشیر ءَ آجو بہ کناھین اِنت، اگاں بھادر ءِبشیر اھمد آجو نہ بوت ما کراچی ءِ نودربر بھادر ءِ کھول ءِ ھواری ءَ کراچی ءَ زھرشانی کنگ بندات کن ایں۔