تربت: کیچ دمگدار ءِ کارگس ءِ دیم ءَ برجاھیں زور بیگواھیں مردمانی کھولانی زھرشانی نندانک ءَ سیزدہ روچ سرجم بوتگ کہ انگت برجاہ اِنت۔ زھرشانی نندانک ءَ کسانیں زھگ ءُ کماشیں مردمانی ھواری ءَ بلوچ یکجھتی کمیٹی ءِ سروک ھم ساڑی اَنت۔
چہ زھرشانی نندانک جاہ ءَ زور بیگواھیں مردمانی کھول ءِ گوشگ اِنت کہ مارا دمگدار ءِ کارگس ءِ دیم ءَ سیزدہ روچ سرجم بوتگ بلے مئے کر ءَ کس نہ یتکگ۔ چہ مئے زور بیگواھیں مردمانی یل کنگ ءَ ابید آدگہ مردم روچ پہ روچ بیگواہ کنگ بوگ ءُ بیگواھیں مردمانی کچ گیش بوگ ءَ اِنت۔ ما پیسر ءَ اد ءَ ھشت زور بیگواھیں مردمانی کھول بوتگ ایں، مرچی ما نو کھول اد ءَ نشتگ ایں۔
آئی ءَ گوشتگ کہ اد ءَ ساری گرم ءُ لوار بوتگ زی ھور ءُ گوات بوتگ بلے ما ھمے گرم ءُ ھور ءِ سر ءَ زھرشانی ءَ نشتگیں بلے اے ریاست ءَ ھمنچو رھم نیست کہ آ مئے سر ءَ بزگ بہ کنت۔ دمگدار ءُ کمک دمگدار کس مئے کر ءَ آھگ ءَ نہ اِنت۔
