بلوچستان آجوئی سنگر ( بی ایل ایپ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں کیچ ءِ ھند شھرک ءَ زورگریں لشکر ءِ کاروان گوں چیرکُرتگیں شورھان ءُ تربت سیٹلائیٹ ٹاؤن ءَ لشکر ءِ کاروان ءِ سر ءَ سنگر گِپتگ ءُ اُرش کُرتگ۔
آئی گوشتگ کہ 26 جون ءَ روچ ءِ دوازدہ ءَ شھرک کوہ پُشت بازار ءَ سی پیک دگ ءِ سر ءَ سرمچاراں زورگریں پاکستانی لشکر ءِ دو ویگو گاڑیانی کاروان گوں چیرکُرتگیں شورھاں نشانگ کُرتگ، یک گاڑی یے تراک ءِ زد ءَ اتکگ ءُ گاڑی ءِ پُشتی بھر سرجم ءَ تباہ بیتگ، گاڑی ءَ سواریں دُرسیں کارمند مُرتگ ءُ ٹپی بیتگ اَنت۔
جارکش ءَ گوشتگ کہ یک زامیاد گاڑی یے ھم اُرش ءِ زد ءَ اَتکگ ءُ بےمیاریں مردمے ٹپی بیتگ۔ چہ ایشی ءَ ما بژنیگیں بلے ما مدام وتی درشانانی تہ ءَ مردم کڈن کُرتگ اَنت کہ آ لشکر ءِ نزیک ءُ گْوراں وت ءَ گستا بہ کن اَنت کہ سرمچار کجام ھم وھد ءُ کجام جاہ ءَ اُرش کن اَنت۔ چہ ایشی ءَ ابید مردم پھریز نہ کن اَنت، اے اُرش ءَ ٹپی بیتگیں مردم ءُ چہ آئی ءِ کھول ءَ دلپدردی درشان کن ایں۔
آئی ءَ گوشتگ کہ دگہ یک اُرشے ءَ سرمچاراں مرچی سُھب ءَ ھپت ءُ نیم ءَ کیچ ءِ بنجاھی شھر تربت سیٹلائٹ ٹاؤن ءَ پیسر ءَ سنگر گِپتگ ءُ لشکر ءِ کاروان ءِ سر ءَ گوں وتکار ءُ ٹوھیں سلاھاں اُرش کُرتگ،اُرش ءِ آسر ءَ دو کارمند جاھی مُرتگ ءُ دو ٹپی بیتگ۔
جارکش ءَ گوشتگ کہ سرمچاراں لشکر ءِ سَے گاڑیانی کاروان ءَ ھواریں رھچار ٹولی ءِ سر ءَ ھما وھد ءَ اُرش کُرتگ وھدے کہ آ چہ تربت بنجل ءَ درکپتگ ءُ ڈی بلوچ بنجل ءَ روگ ءَ بیتگ اَنت۔ سرمچاراں یک گاڑی یے ءُ پیادگیں لشکر نشانگ کُرتگ اَنت ءُ اُرش ءَ گاڑی ءَ ھم کمو تاوان بیتگ۔
آئی ءَ گوشتگ کہ اُرش ءَ پد پروش وارتگیں لشکر ءَ لس آبادی ءِ سر ءَ تیرگْواری کُرتگ کہ چہ ایشی ءَ یک راھگوزے شئیب ء دین مھمد جھمنند دشت اپسی گز ٹپی بیتگ۔
میجر گھرام ءَ گوشتگ کہ داں سرڈگار ءِ آجوئی ءَ زورگریں لشکر ءِ سر ءَ اُرش برجاہ بنت۔
