![](https://zrumbesh.com/wp-content/uploads/2024/06/WhatsApp-Image-2024-06-27-at-04.28.33_e1a35cd5-1024x576.jpg)
شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5493 روچ سرجم بوتگ۔ پنچ شمبے ءِ روچ ءَ بی این ایم ءِ پیشگیں بنجاھی سرکماش ھسا زپر، بی ایس او ءِ بنجاھی کارگشاد سمند ھان، آمر، ھاجی ازیم جتک ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر تران کرتگ ءُ گوشتگ کہ تربت، پنجگور، مشکے ءُ آواران ءَ ھوار سرجمیں بلوچستان ءَ زورگریں لشکر ءِ زوراکی گوں ترندی ءَبرجاہ اَنت۔ پاکستانی لشکر ءَ گوستگیں روچ ءَ کلات اسکلکو ءَ سھب ءَ مھلہ سرجمیں ھند انگر کرتگ ءُ ناشریں کاروائی بندات کرتگ ءُ آبادیانی سر ءَ جنگی بالگرداں بمبگواری کرتگ۔ دو ھپتگ پیش تربت ءُبلیدہ ءَ زورگریں لشکر ءُ آئی زرگپتگیں کشندہ ٹولی ءَ بلوچ راج ءِ سر ءَ ناشریں کاروائی بندات کرتگ ءُ گسانی سر ءَ ارش کرتگ ءُ اے میان ءَ زورگریں پاکستانی لشکر ءَباز مردم آزار دیگ ءَ پد گوں وت برتگ ءُ بیگواہ کرتگ۔
ماما کدیر گوشتگ کہ بلوچستان ءَ مردمی ھک ءُ میان استمانی کانود لپاشگ بوگ ءَ اَنت، اے بازیں کچے ءَ یاداشت بوتگ اَنت۔بلے اکوام متھدہ ءَ ھوار مردمی ھکانی ٹاپار جنوکیں ادارہ بلوچستان ءَ برجاھیں اے ناشرکاریانی سر ءَ بے توار اَنت اے پہ میان استمان ءُ اکوام متھدہ ءَ جستے ودی کنت۔ پاکستان ءَ جھان ءِ بے تواری دیستگ بلوچ چکچینی گوں ترندی ءَ برجاہ داشتگ۔
ماما کدیر گوشتگ کہ بلوچ راجی زرمبشت ءِ بگیری ءَ کشگ ءُ چگل دیگ ءِ شوندات ءِ رد ءَ پاکستان ءَ لھتیں سالانی تہ ءَ ھزارانی کچ ءَ بلوچ پسگ آوار جنگ ءَ پد شھید کرتگ ءُ آیانی ژانگولیں لاش چگل دیگ بوتگ اَنت اے درگت ءَ چہ میان استمانی ٹاپار جنوکیں ڈیھانی نیمگ ءَ ھچ وڑیں گامگیج زورگ نہ بوتگ۔ پاکستان ءَ بلوچستانءِ کنڈ کنڈ ءَ وتی ناشریں زوراکیانی درچ برجاہ داشتگ اَنت ءُ بلوچ آبادیانی سر ءَ ارش کنگ ءَ اِنت۔