گوادر: پسنی ءَ چیریں ادارھانی کارمندانی دست ءَ زور بیگواہ کنگ بوتگیں بھادر بشیر ءِ کھول ءِ نیمگ ءَ پسنی زیروپوائنٹ ءَ مکران شھدگ بند کنگ بوتگءُ پسنی پریس کلب ءِدیم ءَ زھرشانی کرتگ۔ زھرشانی ءَ مردماں بازیں کچے ءَ بھر زرتگ۔
دگ ءِ بند بوگ ءِ سوب ءَ دوئیں نیمگاں گاڑیانی مزنیں کتار اوشتوک بوتگ اَنت۔ پسنی، گوادر، جمیڑی، مند، تربت ءُ کراچی ءِ مساپر سکا جنجالانی دیمپان اَنت۔
کھول ءِ گوشگ اِنت کہ بھادر بشیرکراچی زانشتجاہ ءِ نودربرے پاکستانی لشکر ءَ زی آوار جتگ ءُ بیگواہ کرتگ۔ دانکہ مئے زھگ یل کنگ نہ بوتگ ما وتی زھرشانی ءَ برجاہ دار ایں۔
