تربت: تمپ ءِ میتگ کونشکلات ءِ جاہ منند انیسہ ءِگون ءَ پاکستانی لشکر ءِ زوراکیانی بگیری ءَ بلوچ یکجھتی کمیٹی ءِ سروکاں گوں انسیہ ءِ ھمراھی ءَ تربت پریس کلب ءَپریس کانپریس کرتگ ءُ گوشتگ کہ مئے مرچی پریس کانپریس ءِ مول ریاستی لشکر مدام شپ ءَ جنوزامیں انیسہ کہ کونشکلات ءِ جاہ منند اِنت آئی گس ءَ بیڑ بر اَنت ءُ بلوچ ءِ چادر ءُ چاردیوال ءَ لگتمال کنگ ءُ آیاں ترسینگ،گس ءِ گرانھادیں سامان، مال ءُ دلوتاں برگ ءَ اَنت۔ انیسہ ءِ لوگواجہ آسم پکیر ریاستی لشکر ءَ 2 پروری 2013 ءَ چہ تربت ءِ نودز ءَ آوار جتگ ءُ جانی ءُ سسائی آزاراں پد آئی ژانگولیں لاش چگل داتگ۔ شانزہ سال بیت کہ ریاستی لشکر اے جنوزام ءَ مدام ترسینگ ءَ اَنت۔ چہ ایشی ءَ ابید12 مارچ 2023 ءَ سرار ء اتا اللہ کہ انیسہ ءِ گھارزتک اِنت پاکستانی لشکر ءَ شپ ءِ نیم ءَ آئی جند ءِ میتگ کونشکلات ءَ بیڑ برتگ ءُ لٹ شاپ کنگ ءَ پد بیگواہ کرتگ کہ انگت ءَ بیگواہ اِنت۔ ریاستی لشکر ءِ نیمگ ءَ یکشل ءَ انیسہ ءُ آئی کھول دلسیاہ کنگ بوگ ءَ اَنت چہ ایشی ءَ آ سکا جنجالانی دیمپان اَنت۔ بے میار ءَ گساں بیڑ برگ ءُ جنین ءُ زھگانی گون ءَ زوراکی ءُ آیانی ترسینگ ڈیھ ءِ راھبند ءُ کانود ءِ بگیری ءَ ھوار بلوچ ءِ ننگ ءِ لپاشگ اِنت۔
آئی ءَ گوشتگ کہ یک جون 2024 ءَ ریاستی جوڑ کرتگیں کشندہ ٹولی ءَ مردمانی سر ءَ تیرگواری کرتگ ءُ گس ءِ دروازگ نشانگ کرتگ چہ ایشی ءَ ابید 19 جون 2024 ءَ شپ ءِ یک ءَ پاکستانی لشکر ءَ بازیں کچے ءَ گس چاریں نیمگاں انگر کرتگ ءُ گس ءَ پترتگ اَنت ءُ انیسہ ءِ پیریں مات ءُ پت کہ آنادراہ اَنت گوں توپک ءِبٹ ءَ جتگ اَنت ءُ انیسہ ءِ سر ءَ توپک داشتگ ءُ کشگ ءِ بیھار داتگ، موبائل ءُ آدگہ گرانھادیں سامان گوں وت برتگ اَنت۔ انیسہ ءِ دو کسانیں زھگ اَنت کہ آ چہ لشکر ءِ زوراکیانی سوب ءَ سکا گمیگ ءُ ترس آماچ اَنت۔ بے میار ءَ جنوامیں جنین ءُ آئی مات ءُ پتانی جانی ءُ سسائی آزار دیگ کجام راھبند ءُ کانود ءِ کار اِنت۔
آئی ءَ گوشتگ کہ اے وڑیں بازیں ویل دیم ءَ پیداک اَنت اود ءَ پاکستانی لشکر درکانودی مردمانی گساں بیڑ برگ ءُ جنین ءُ زھگانی گون ءَ زوراکی کنگ ءَ اِنت۔ میتگ، کوچگ ءُ دوریں ھندانی مردم چہ لشکر ءِ زوراکیاں دلسیاہ اَنت۔ اے کجام انساپ اِنت کہ انسیہ ءِ جود بے میار ءَ کشتگ ءُ آئی گس تباہ کرتگ ءُ کھول ءِ آدگہ مردمانی گون ءَ زوراکی کنگ ڈیھ ءُ میان استمانی راھبندانی بگیری اِنت۔
آئی ءَ گوشتگ کہ ما رسانکدر ءِ رد ءَ گوں چیپ جسٹس ءُ میان استمانی مردمی ھکانی ادارھانی گون ءَ لوٹ کن ایں کہ انیسہ ءِ گون ءَ انساپ ءُ آئی پھازداری بہ بیت۔ پاکستانی لشکر چہ وتی زوراکیاں جنوزامیں انسیہ ءِ پیریں مات ءُ پتءُ زھگاں سکا دلیساہ کنگ ءُ ترسینگ ءَ اَنت۔ ما گوں بلوچ راج ءِ شھزانتیں بھرگ ءَ لوٹ کن ایں کہ آ انیسہ ءُ گوں آئی کھول ءَ پہ انساپ دیگ ءَ توار چست بہ کنت۔ بلوچستان ءَ اے وڑیں بازیں کھول ھست اَنت کہ پاکستانی لشکر ءِ زوراکیانی آماچ اَنت۔ چہ ایشی ءَ ابید یونائیٹیڈ نیشن مردمی ھکانی توار چست کنوکانی گون ءَ لوٹ کن ایں کہ آ بلوچستان ءَ بیوکیں مردمی ھکانی ادارھانی لگتمالی ءُ ریاستی زوراکیانی گر ءُدارکنگ ءَ یک پیک پائنڈنگ کمیشنے دیم بہ دنت ءُ بلوچ راج ءِ ریاستی گنتریں چکچینی شونداتانی پہ پھریزگ ءَ وتی کرد ءَ پیلو بہ کنت۔
