آواران: زورگریں پاکستانی لشکر ءِ دست ءَ زور بیگواہ کنگ بوتگیں دلجان ءِ کھول ءِ زھرشانی نندانک ءَ مرچی سیزدہ روچ اِنت کہ آواران دمگدار ءِ کارگس ءِ دیم ءَ برجاہ اِنت۔
شمبے ءِ روچ ءَ زور بیگواھیں دلجان ءِ گھار بی بی زینب پہ وتی برات ءِ یل نہ کنگ ءِ بگیری ءَ داں مرگ شدکشیں زھرشانی ءَ نشتگ۔
اے وھد ءَ زور بیگواھیں دلجان ءِ کھول ءِ ھواری ءَ سول سوسائیٹی، بلوچ وومن پورم ءِ سروکاں ھوار سیاسی ءُ چارگردی کارکن، جنین ءُ زھگ بازیں کچے ءَ زھرشانی نندانک ءَ ساڑی اَنت۔ مرچی ھور بوتگ بلے مردم انگت زھرشانی ءَ نشتگ اَنت۔
زھرشانی ءَ نشتگیں مردمانی گوشگ اِنت کہ اے وھد ءَ آواران ءَ ھور گوں ترندی ءَ برجاہ اِنت، نندانک ءَ نشتگیں مردمان ءَ تمبو ھم نیست ءُ انگت ءَ مردماں ھور ءِ سر ءَ ھم وتی زھرشانی نندانک برجاہ داشتگ۔
آئی ءِ گوشگ اِنت کہ آواران ءِ انتزامیہ ءَ زھرشانی ءَ نشتگیں مردم تمبو جنگ نہ اِشتگ اَنت۔ اے وھد ءَ زھگ ءُ جنین ھور ءِ سر ءَ نشتگ اَنت۔
آئی ءِ گوشگ اِنت کہ مئے زھرشانی نندانک ءَ سیزدہ روچ سرجم بوتگ، بلے چہ آواران ءِ انتزامیہ ءِ نیمگ ءَ پہ مئے لوٹانی منّگ ءَ ھچ وڑیں دلجمیں گامگیج زورگ نہ بوتگ۔
