بلوچ راجی زْرمبشت ( بی این ایم ) ءِ جارکش ءَ گْوشتگ 28 جون 2009 ءِ روچ بلوچستان ءِ گْوستانک ءِ سیاھیں درے ، ھمے روچ ءَ مئے بنجاھی راھشون ڈاکٹر دین مھمد پاکستانی لشکر ءَ دزگیر کنگ ءَ پد بیگواہ کرت۔مروچی 15 سال گْوزگ ءَ پد ھم پاکستانی مھترھند ءُ لشکر ءَ چوشیں توانے نیست کہ آ ڈاکٹر دین مھمد ءَ وتی چوناھیں ھم آمیدگسے ءَ پیش بہ کنت۔ اے روچ مارا ناں ایوک ڈاکٹر دین مھمد ءِ تْرانگ ءَ گیج ایت بلکیں بلوچستان ءَ برجاھیں زور بیگواھیانی دردناکیں داستانانی گواھی ءَ ھم دنت۔
جار کش ءَ گْوشتگ ڈاکٹر دین مھمد ءِ زور بیگواھی ءَ ناں ایوک ءَ آئی ءِ کھول بلکیں بلوچ چاگرد ءِ سر ءَ ھم دور رسیں سان اشتگ۔آئی ءِ کسانسال ءُ اوبالیں جنک زھرشانی گدان ، آمیدگس ءُ نام گپتیں کمیشناں رست ءُ ورنا بوت اَنت۔ ڈاکٹر دین مھمد ءِ کھول چہ رنجاں سربار اِنت۔
آئی ءَ گْوشتگ ڈاکٹر دین مھمد ءِ زوربیگواھی پہ گل ءُ کھول ءَ انچیں تاوانے کہ بھ پر نہ بیت، اے انچیں بدیں جاورے کہ گوں دانکاں درشانگ نہ بیت، بلے آئی ءِ بھادر ءُ باسنچیں جنکاں وتی پت ءِ زوربیگواھی ءِ درد وتی توان جوڑ کرت ءُ پاکستانی لشکر ءُ چیریں واکانی دستاں سرجمیں زور بیگواھیں مردمانی توار جوڑ بوت اَنت ءُ مروچی سمی ناں ایوک ءَ بلوچستان بلکیں میان استمانی تک ءَ ھم مردمی اگبالانی بندیرا دار ( علمبردار) ءِ بستار ءَ زانگ بیت۔سمی ءِ کوشست گواچن کنت کہ دشمن ءِ داتگیں درد توان ءُ ھاٹیگ جوڑ کنگ ءُ گوں وھد ءِ زوراکاں مڑگ بیت۔
28 جون ءَ ما ھمے روچ ءِ دم ءُ درگت ءَ جھل ءِ سرگرمیاں کن ایں۔
1۔ سوشل میڈیا کمپین : ما #ReleaseDrDeenMohammad اور #StopEnforcedDisappearances ءِ ھیش ٹیگانی پجیگ ءَ چاگردی رسانکدر ءَ زبردستیں کمپینے ھلائین ایں۔ گل ءُ مردمی اگبالانی پانک ءُ مردم دوستیں مردماں دزبندی اِنت کہ آ اے کمپین ءَ شریں وڑے ءَ بھر بہ زیر اَنت ءُ پہ ڈاکٹر دین مھمد ءِ درائی ءَ مئے توار جوڑ بہ بہ اَنت۔
2: یات گیجی مراگش : اے روچ ءَ گل ءِ درسیں تْرامگیج ڈاکٹر دین مھمد ءِ کار ءُ کرد ، پہ آئی ءِ درائی ءَ جھد ءُ بلوچستان ءَ پاکستانی لشکر ءُ چیریں واکانی دست ءَ مردمی اگبالانی سنگینیں بگیری ءِ سر ءَ یات گیجی مراگش ایر کن اَنت۔ اے مراگشاں ڈاکٹر دین محمد ءِ جھد ، آئی ءِ چکانی پہ آئی ءِ درائی ءَ جھد ءُ پہ مردمی اگبالاں آیانی کرد ءُ کارانی سر ءَ گپ جنگ بیت۔
3: پنتاک : ڈاکٹر دین مھمد ءِ کرد ءُ کارست ، جھد ءُ پہ آئی ءِ درائی ءَ آگاھی مھم ءِ رد ءَ پنتاک بھر کنگ بیت آیانی تہ ءَ ڈاکٹر دین مھمد ءِ زند ءُ کرد ، آیانی تہ ءَ زوربیگواھی ءُ بلوچستان ءِ دردناکیں مردمی ویل ءِ بارہ ءَ نبشتہ بیت۔
4: آگاھی مھم : میان استمانی تک ءَ جتائیں ھند ءُ جاھاں آگاھی مھم برجم دارگ بیت داں گیش ءَ گیش مردماں اے مزنیں جیڑہ ءِ بارہ ءَ سرپدی دیگ بہ بیت۔
ما چہ شما دزبندی کن ایں کہ اے روچ ءَ مئے کمپیناں شریں وڑے ءَ بھر بہ زیر اِت ءُ ڈاکٹر دین مھمد ءِ درائی ءُ بلوچستان ءَ برجاھیں زور بیگواھیانی بگیری ءَ وتی توار ءَ چست بہ کن اِت۔ چہ شمئے بھر زیرگ ءُ پلہ مرزی ءَ ما اے زوراکی ءِ بگیری ءَ پرتوانیں توارے ودی کرت کن ایں۔ مروچی ، ما اے مسام بہ کن ایں کہ ما گوں ھمدستی ءَ میان استمانی گھار ( ضمیر ) ءَ ژامبلین ایں داں مئے ماتانی زار ، گھارانی پریات ءُ چکانی چیھانٹ میان استمانی تک ءَ گوش دارگ بہ بہ اَنت۔
