شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5489 روچ سرجم بوتگ۔ یک شمبے ءِ روچ ءَ بی ایس او ءِ پیشیگیں سرکماش زبیر، ندیم، ھدا ءِ رھم ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ مرچی بلوچ راجی زرمبشت یک انچیں جاھے ءَ سر اِنت کہ ھمک دمک ءَ بلوچ ءِ ھون ریچی اِنت ءُ ھزارانی کچ ءَ ورنا، کماش ءُ زھگ بیگواہ اَنت ءُ چیریں آزارجاھاں آزارانی دیمپان اَنت۔ گیشتریں مردمانی باروا کس نہ زانت کہ زندگ اَنت یامچی مانشجاھانی تہ ءَ چگل دیگ بوتگ اَنت۔ نشانگ کنگ ءِ درچ برجاہ اِنت۔ پہ ٹکی جنگانی نام ءَ چاگرد بھر ءُ بانگ بوگ ءَ اِنت۔ ھمک نیمگ ءَ آس روک اِنت، لکانی کچ ءَ بلوچ چہ لشکرکشیاں لڈ ءُ بار کنگ ءَ لاچار کنگ بوتگ اَنت۔
آئی ءَ گوشتگ کہ ھما مردم پہ بلوچستان ءِ مھبت ءِ نام ءَ زورگریں ریاست ءِ کار ءَ ارزاں کنگءَ اَنت آھچ وڑ ءَ منگ نہ بنت۔ کسے ءَ منگ ءُ کسے ءِ نہ منگ ءِ نام ءَ جھدجکارانی میان ءَ ایرادگری ودی کنگ ءَ اَنت ۔ لس بلوچاں وتی سرجمیں زندمان، کھولانی دیمونی داتگ آ اے گپاں بہ اش کن اَنت ءُ آیانی دل ءَ چے ودی بیت ءُ آیانی توکل نزور تر ایت۔ اے وڑیں مردم چہ وتی لڑاں کشگ لوٹ اَنت۔
