شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5488 روچ سرجم بوتگ۔ شمبے ءِ روچ ءَ پی ٹی ایم بیلجیئم ءِ رھوتدار شرین ھان کاکڑ، میوند ھان کاکڑ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِکمک سرکماش ماما کدیر گوں مردماں تران کرتگ ءُ گوشتگ کہ گیشتر زورگر پہ جھان ءِ رد دیگ ءُ وتی رستریانی چیر دیگ ءَ دیوان برجم دار اَنت۔ بلے مستریں بد بھتی ھمیش اِنت کہ پہ مردمی ھکانی نام ءِ سر ءَ جوڑ بوتگیں گل ھمایانی پندلانی آماچ بنت ءُ ھمایانی گپاں زور اَنت۔ اے گپ ءَ زان اَنت کہ ناشرکار کدی ھم وت ءَ ھراب نہ لیک اَنت۔ پاکستان ءِ گوستانک ءَ آئی امر انچو مزن نہ اِنت، مھکمیں ارادھانی جھدکار ءُ بلوچ، پشتونءُ ھزارھانی سرانی دیمونی زورگر ءَ نیست ءُ نابود کنت۔
ماما کدیر گوشتگ کہ بلوچ چکچینی ءَ پاکستان تچکی ءَ مردماں پاھو دیگ، مچی مانش ءُ ژانگولیں لاشانی چگل دیگ ءِ دروشم ءَ بلوچ راج ءِ ھزارانی کچ ءَ ورنا وتی زوراکیانی آماچ کرتگ بلےگوستانکی جھد برجاہ اِنت۔ نوں مارا ھمے گمان بیت کہ آھوکیں روچاں وتگڑیں مزن وزیر ءُ سرکار بلوچستان ءَ بلوچ، پشتون چکچینی ءَ تیز کنت ءُ پہ وتی وپاداری ءِ پیش دارگ ءَ چہ پیشیگیں سرکاراں دوگام دیم ءَ جنگ ءَ اِنت۔ ڈیرہ بگٹی، کوھلو، مکران ءُ ھاران ءَ لشکر ءَ کارمزرز کنگ ءَ اِنت۔
