بیگواھیں بلوچانی توار ( وی بی ایم پی ) ءِ سرکماش نسرا للہ وتی شنگ کرتگیں درشانے ءَ گوشتگ کہ تربت ءَ زور بیگواھیں مردمانی کھول پہ وتی آیزانی آجوئی ءَ چہ آئید ءِ روچ ءَ پدا چاراہ ءَ زھرشانی ءَ نشتگ اَنت ءُ زی بیگاہ ءَ آیاں وتی زھرشانی نندانک دمگدار ءِ کارگس ءِ دیم ءَ برتگ۔
آئی ءَ گوشتگ کہ گوں بژن ءَ گوشگ بیت سرکار ءَ انگت ءَ پہ بیگواھیں مردمانی کھولانی زھرشانی نندانک ءِ باروا نہ دلگوش گور کرتگ ءُ نہ ھچ جاہ ءَ پہ آیانی آزیزانی آجوئی ءَ دلجمی دیگ ءَ گامگیج زورگ ءَ اِنت۔ اے یک بے راھبندیں کارے ءُ ایشی ءَ ایر جن ایںءُ گوں سرکار ءَ لوٹ کن ایں کہ آ تربت ءَ کمک دمگدار ءِ کارگس ءِ دیم ءَ نشتگیں کھولانی زھرشانی نندانک ءِ باروا دلگوش ءَ گور بہ کنت ءُ پہ آیانی لوٹانی منگ ءَ گپ ءُ تران ءَ بندات بہ کنت ءُ پہ آیانی آزیزانی یل کناھینگ ءَ دلجمی بہ دنت ءُ اے گمتیں کھولاں چہ سرجمیں زندگی ءِ اندوھاں بہ رکین ایت۔
