کیچ ءِ ھند کونشکلات، تمپ ءَ پرندوشی شپ ءِ یک ءُ نیم ءَ بلوچی زبان ءِ گشندہ ءُ زرمبش زیمر ءِ سروک استاد منھاج مکتار ءِ گس ءَ پاکستانی لشکر ءُ چیریں ادارھانی کارمنداں بیڑ برتگ ءُ جنین ءُ زھگانی گون ءَ زوراکی کرتگ۔
اے درگت ءَ بلوچ راجی زرمبشت ( بی این ایم ) ءِ سرکماش ڈاکٹر نسیم ءَ ماں چاگردی رسانکدر ایکس ءَ وتی ٹویٹے ءَ گوشتگ کہ یکبرے پد ءَ پاکستانی لشکر ءَ بلوچستان ءِ ھند تمپ ءَ نامداریں گشندہ منھاج مکتار ءِ کھول ءِ سر ءَ بیڑ برتگ ءُ آ دلسیاہ کرتگ اَنت۔ آچہ وتی ازم ءِ پارست ءَ بلوچستان ءِ آجوئی ءِ گپ ءَ کنت۔ پاکستان پہ بلوچ راج ءِ ھلاس کنگ ءَ بلوچی ساز ءُ زیمل، دودمان ءُ ربیتانی ھلا س کنگ ءِ جھد ءَ اِنت۔
آئی ءَ دیمتر ءَ گوشتگ کہ ھمک مردم ءَ تیوک ءَ بلوچ گشندھاں پہ وتی ھمبلیں زمکار ءِ بگیری ءَ اے ناشریانی بگیری ءَ توار چست کنگ لوٹ ایت۔
ھمے وڑ ءَ بلوچ راجی زرمبشت ( بی این ایم ) ءِ بنجاھی رسانکدری کارگشاد کازی داد مھمد ریھان ءَ رسانکدری تندجاہ ایکس ءَ نبشتگ کہ پاکستانی لشکر ءَ یکبرے پد ءَ آشوبی گشندہ ءُ زرمبش زیمر ءِ سروک استاد مھاج مکتار ءِ گس ءَ بیڑ برتگ ءُ گوں آئی کھول ءَ زوراکی کرتگ۔ ما اے گامگیج ءَ گوں ترندیں دانکاں ایر جن ایں۔
استاد منھاج مکتار یک آشوبی گشندھے ءُ زرمبش زیمر ءِ سروک اِنت ءُ اے وھد ءَ آئی چنچو پیت ببند شنگ بوتگ اَنت۔ آ چہ وتی آشوبی سوتاں مدام ریاست ءِ زوراکیانی نشانگ اِنت۔ آئی کھول مدام زوراکیانی دیمپان اِنت۔ باز بر ءَآئی گس ءِ سر ءَ تیرگواری، بیڑ ءُ لٹ ءُ پل ءِ ھواری ءَ چنچو بر ءَ گس ماندارگ بوتگ اَنت۔ منھاج مکتار ءِ گھارزتک اسرار ء اتا انگت پاکستانی لشکر ءِ دست ءَ بیگواہ اِنت۔
یات بہ بہ اِت کہ ریاستی لشکر استاد منھاج مکتار ءِ گس ءِ مردم ءُ آئی جنوزامیں گھار ءُ آئی زھگاں مدام دلسیاہ کنگ ءَ اِنت۔ ھمک وھد ءَ گساں بیڑ برگ ءُ یا راھاں دارگ ءُ دلسیاہ کنگ ءَ اَنت۔ منھاج مکتار ءِ زامات آسم پکیر ءَ 26 مئی 2013 ءَ پاکستانی لشکر ءَ شھید کرتگ ءُ آئی زھگاں مدام دلسیاہ کنگ ءَ اِنت۔ گساں بیڑ برگ ءِ میان ءَ درسیں گرانھادیں سامان، مال ءُ دلوت، موبائل پوناں ھم پلگ ءُ برگ ءَ اَنت۔ پاکستانی لشکر ءَ پہ بیڑ برگ ءَ ھندی کشندہ ٹولی ءُ چریک کمک کنگ ءَ اَنت۔
رسانکدر ءَ جتائیں سیاسی پارٹی ءُ چاگردی کارکناں استاد منھاج مکتار ءِ گس ءَ بیڑ برگ ءُ آئی کھول ءِ گون ءَ زوراکی گوں ترندیں دانکاں ایر جتگ اَنت۔
