بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے پتہ اسکواڈ ءَ شال ءَ اھواتی ھالے ءِ بنیاد ءَ لشکر کشی کرتگ ءُ دہ شکی ئیں مردم دزگیر کرتگ۔
آئی ءَ گوشتگ کہ اے کاروائی بی ایل ءِ ٹولی پتہ اسکواڈ ءَ چیریں ھالے ءِبنیاد ءَ شال ءِ ھند زرگون ءِ نزیک ءَ شھبان ءَ گوں سوبمندی ءَ کرتگ۔
جارکش ءَ گوشتگ کہ بی ایل اے ءِ چیریں بھرگ ءَ ھال داتگ کہ شھبان ءَ لھتیں شکی ئیں مردم تر ءُ گرد کنگ ءَ اَنت، ھمے بنیاد ءَ بی ایل اے ءِ پتہ اسکواڈ ءَ ھمےھند ءَ زوت کاروائی کرتگ ءُ دہ شکی ئیں مردم دزگیر کرتگ اَنت۔
بی ایل اے ءِ جارکش جیھند ءَ گوشتگ کہ اے مردمانی جست ءُ پرس برجاہ اِنت، جست ءُ پرس ءِ سرجم بوگ ءَ پد بلوچ آمیدگس ءَ پیش کنگ بنت۔ گواہءُ منانکانی پارست ءَ سوڑگ کنگ بیت۔ سوڑگ ءِ باروا رسانکدر ءَ ھم گوشگ بیت دانکہ آیانی کارپدانی باروا کھول سھی بہ بنت۔
