تربت/ گوادر: زورگریں پاکستانی لشکر ءَ زبیر ءُ چنگیز نامیں دو ورنا آوار جنگ ءَ پد بیگواہ کرتگ اَنت۔
اھولکار ءِ رد ءَ زور گریں پاکستانی لشکر ءَ تربت ءِ میتگ شاھی تمپ ءَ دوشی شپ ءِ یک ءَ بیڑ برتگ ءُ زبیر ء مھمد آوار جتگ ءُ بیگواہ کرتگ کہ انگت بیگوہ اِنت۔ چہ گوادر ءَ پاکستانی لشکر ءِ دست ءَ بیگواہ کنگ بوتگیں ورنا ءِ نام چنگیز ء وارس اِنت کہ کودگ، کوڑاسک ءِ جاہ منند اِنت۔ چنگیز 12 جون ءَ چہ گوادر ءَ آوار جنگ ءُ بیگواہ کنگ بوتگ۔ زوربیگواھیں چنگیز نودربرے آیاں دیر اِنت گوادر ءَ شتگ اَنت ءُ اود ءَ دکانداری کنگ ءَ اَنت۔
بلوچ راجی زرمبشت ( بی این ایم ) ءِ مردمی ھکانی ادارہ پانک ءَ زبیر ءُ چنگیز ءِ زوریں بیگواھی ءِ گپ راست کرتگ ءُ ماں چاگردی رسانکدر ءِ تند جاہ ایکس ءَ آیانی اکس شنگ کرتگ اَنت ءُ آجوئی ءِلوٹ کرتگ۔
یات بہ بہ اِت کہ زورگریں پاکستانی لشکر ءَ دوشی چہ تربت ءَ دو ورنا آسپ ء کاسم ءُ الی اھمد ء زریپ آوار جتگ ءُ بیگواہ کرتگ اَنت۔
