شال: پہ زور بیگواھیں مردمانی پدجنگءَشدکشیں زھرشانی گدان ءَ 5476 روچ سرجم بوتگ۔ سے شمبے ءِ روچ ءَ بی ایس او پجار ءِ پیشیگیں سرکماش بوھیر، گوں وتی آدگہ ھمبلانی ھمراھی ءَ پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِکمک سرکماش ماما کدیرگوں مردماں تران کرتگ ءُ گوشتگ کہ پاکستان ریاست بلوچ سرڈگار ءِ سر ءَپہ وتی زورگپتی ءِ برجاہ دارگ ءَ ھمک روچ بلوچ پسگاں چہ بلوچستان ءِ جتائیں ھند ءُ پنجاپ ءِ جتائیں زانشتجاھاں انچوش کہ لاھور، سرگودھا ءُ اسلام آباد ءَ آوار جنگ ءُ بیگواہ کنگ ءَ اِنت آ دانکہ بلوچاں چہ وانگ ءَدور بدار ایت۔
ماما کدیر گوشتگ کہ بلوچستان ءِ پسگانی آوار جنگ، بلوچ چکچینی لس آبادیانی سر ءَ بمبگواری ءُپاکستانی لشکر ھمک روچ جنین ءُ زھگاں لٹ شاپ کنگ ءَ اِنت۔ نوں ریاستی زوراکی بلوچ ءِ زندگی ءِ بھرے جوڑ بوتگ۔ ریاست ءِ اے درسیں زوراکیاں بلوچ راج شیوار کرتگ کہ آ دراجشکیں ایردستی ءِ بگیری ءَجھد ءَ جوانیں کردے پیلو کنگ ءَ اَنت ءُ بلوچ راج ایردستی ءِ بگیری ءَ سرپدی اِش داتگ۔ بلوچ ءِ جھد گوں سوبمندی ءَ دیم پہ منزل ءَ جنزگ ءَ اِنت۔
ماما کدیر گوشتگ کہ پاکستان سرکار پہ بلوچ جھد ءِ دارگ ءَ پاکستانی لشکر ءِ ھواری ءَ چیریں ادارہ ءُ وتگڑیں سیاسی ٹولیاں کارمرزکنگ ءَ اِنت۔
