بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں 10 جون 2024 ءَ پاکستانی لشکر ءِ دو کارمند چہ کیچ ، تربت ءِ آپسر ڈن ءَ دزگیر کُرتگ۔چہ ایشاں یکے ءِ نام بشیر اھمد ء منزور ءُ دومی ءِ نام رازک ء میا داد اِنت۔
آئی ءَ گوشتگ کہ دزگیر کُرتگیں دوئیں لشکری کارمند بلوچ اَنت کہ آیاں زوگریں پاکستانی لشکر ءَ برتی بیگ ءِ سر ءَ شرمندگی درشان کُرتگ ءُ وتی ردی ءِ پھلی لوٹ اِتگ۔دوئیں لشکری کارمنداں چہ لشکر ءَ دراھگ ءِ جار جتگ ءُ پہ گزران کنگ ءَ مزوری کنگ ءُ گوں لشکر ءَ ھچ پیمیں نزیکی نہ کنگ ءِ دلجمی داتگ۔
جارکش ءَ گوشتگ کہ بی ایل ایپ ءَ دوئیں لشکری کارمندان ءَ یک موھے داتگ،پھل کُرتگ ءُ یل داتگ اَنت۔
آئی ءَ گوشتگ کہ ما چہ بلوچ ورنایاں لوٹ کن ایں ایوک ءَ پہ روزگار ءَ زورگریں پاکستان ءِ رستریں لشکر ءُ آدگہ پھازداری لشکر ءَ برتی مہ بنت ءُ بلوچ راج ءِ بگیری ءَ آیانی جنگی میارمیاری ءُ بلوچ چُکچینی ءِ میار ءَ شریدار مہ بنت۔
میجر گھرام ءَ گوشتگ :ما لوٹیں کہ بلوچ ورنا ایوک ءَ پہ پگار ءَ دژمنیں لشکر ءَ برتی بیگ ءِ جاہ ءَ بی ایل ایپ ءَ ھوار بہ بنت ءُ پہ بلوچستان ءِ آجوئی ءَ وتی راجی زمہ واری ءَ پیلو بہ کن اَنت۔چہ پاکستانی زورگری ءَ آجوئی ءَ بگر اَنت ءُ بلوچ راج نہ ایوک ءَ جھان ءَ یک شرپداریں راجے جوڑ بیت بلکیں چہ بلوچستان ءِ مادنانی پُشت ءَ زوت دیمروی کنت ءُ پاکستانی نوآبادیات ءِ داتگیں نیزگاری،بےروزگاری،نادراھی،ناوانندگی ءُ چاگردی نادراھیاں زوت ھلاس کنت۔
