ھزدار: گوستگیں روچ ءَ پاکستانی چیریں ادارھانی کارمندانی دست ءَ زوربیگواہ کنگ بوتگیں نودربر انیس ءِ کھول ءَ آئی یل نہ کنگ ءِ بگیری ءَ اوامی پمپ ءِ نزیک ءَ شال کراچی شھدگ زھرشانی ءَ بند کرتگ۔
زھگ ءُ جنیناں ھوار لس مردماں بازیں کچے ءَ بھر زرتگ۔ زھرشانی کنوکیں مردماں زور بیگواھیں انیس ءِ اکس ءُ پلے کارڈ دستاں بوتگ اَنت کہ آیاں زوریں بیگواھیانی بگیری ءَ اوگام جتگ ءُ انیس ءِ آجوئی ءِ لوٹ کرتگ۔
یات بہ بہ اِت کہ زور بیگواھیں انیس بھاوالدین زکریا زانشتجاہ ءِ نودربرے چار ءُ پنچ جون ءِمیانی شپ ءَ آوار جنگ ءُ بیگواہ کنگ بوتگ۔ انیس ءِ زوریں بیگواھی ءِ بگیری ءَ کھول ءَ شش جون ءَ زھرشانی ءَ شال کراچی شھدگ بند کرتگ اَت، واکدار ءِ نیمگ ءَ آئی یک روچے ءَ یل کنگ ءِ دلجمی دیگ ءَ کھول ءَ زھرشانی ھلاس کرتگ۔
