بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسا نکدر ءَ وتی شنگ کرتگیں درشانے ءَ گوشتگ کہ سرمچاراں کیچ ءِ ھند زامران ءُ ھوشاپ ءَ دژمنیں لشکر ءِ پانگسانی سر ءَ اُرش کُرتگ ءُ سَے کارمند کُشتگ ءُ سولر سسٹم ءُ کیمرہ نشانگ کُرتگ اَنت۔
آئی ءَ گوشتگ کہ شش جون 2024 ءِ بیگاہ ءِ سَے ءَ سرمچاراں زامران ءَ زامُری ءِ کور ءَ زورگریں پاکستانی لشکر ءِ پانگس ءِ سر ءَ پیسر ءَ گوں اسنائپر توپک ءَ نشانگ کُرتگ ءُ پانگس ءِ پھازداری سنگر ءَ ساڑی ئیں یک کارمندے کُشتگ۔ چہ ایشی ءَ پد سرمچاراں گوں وتکاریں سلاھاں دژمن ءِ پانگس ءِ سر ءَ اُرش کُرتگ ءُ سولر سسٹم ءُ کیمرہ نشانگ کُرتگ ءُ تباہ کُرتگ اَنت۔
جارکش ءَ گوشتگ کہ دگہ یک اُرشے ءَ سرمچاراں ھپت جون ءِ بیگاہ ءَ ھوشاپ ءُسھاکی ءِ میانجی ءَ برجاھیں زورگریں پاکستانی لشکر ءِ پانگس ءِ سر ءَ گوں ٹوھین ءُ وتکاریں سلاھاں اُرش کُرتگ، اُرش داں پانزہ دمان ءَ برجاہ بیتگ، اُرش ءَ زورگریں پاکستانی لشکر ءِ دو کارمند مُرتگ ءُ دو ٹپی بیتگ۔
بی ایل ایپ ءِ جارکش میجر گھرام ءَ ارشانی زمہ واری من اتگ ءُ گوشتگ کہ داں بلوچ سرڈگار ءِ آجوئی ءَ زورگریں پاکستانی لشکر ءِ سر ءَ سرمچارانی اُرش برجاہ بنت۔
