شال: زوربیگواھیں بلوچ نودربر سروک زاکر مجید ءِ زوریں بیگواھی ءَ پانزدہ سال سرجم بوگ ءُ آئی یل نہ کنگ ءِ بگیری ءَ کھول ءَ شال پریس ءِ دیم ءَ زھرشانی کنگ ءِجار جتگ۔
زور بیگوھیں زاکر مجید ءِ مات ءَ وتی شنگ کرتگیں تامربندے ءَ گوشتگ کہ 8 جون 2009 ءَ پاکستانی چیریں ادارھانی کارمنداں زاکر جان ءَ چہ مستونگ پڑنگ آباد ءَ آوار جتگ ءُ بیگواہ کرتگ۔ زاکر جان ءِ دو سنگت یل کنگ بوتگ اَنت زاکر جان انگت بیگواہ اِنت۔من ھما انت وتی زھگ ءِ ودار ءَ آں۔
آئی ءَ گوشتگ کہ ھشت جون ءِ بیگاہ ءَ شال پریس کلب ءِ دیم ءَ زھرشانی کنگ بیت من گوں بلوچ راج ، بلوچ نودربر، سیاسی پارٹی ءُ ٹویٹر ءِ کارمز کنوکانی گون ءَ لوٹ کن آں کہ آ بیا اَنت ءُ اے زھرشانی ءَ بھر بزور اَنت ءُ یک توار بہ بنت پہ زاکر جان ءَ توار چست بہ کن اَنت۔
اے باروا بلوچ یکجھتی کمیٹی ءِ سروک ڈاکٹر ماہ رنگ ءُ بیگواھیں بلوچانی توار ( وی بی ایم پی ) ءِ کارگشاد سمی دین ءَ گوں مردماں لوٹ کرتگ ءُ گوشتگ کہ باندا بیا اَنت ءُ زھرشانی ءَ بھر بزور اَنت۔
