بلوچ اسٹوڈنٹس آرگنائزیشن ءِ جارکش ءَ وتی شنگ کرتگیں درشانے ءَ گوشتگ کہ بلوچستان زانشتجاہ ءِ بلوچی، براھوئی ءُ پشتون بھرگانی بندی تھنا بھرگانی بندی نہ اِنت بلکیں بلوچستان ءَ راجی زبان، دودمان ءُ ربیتانی سر ءَ تچک ءَ ارش اِنت۔
آئی ءَ گوشتگ کہ وانگجاھانی بندی تھنا وانگی بنجاھانی بندی نہ اِنت بلکیں اے راجانی لیکھی ءُ دودمانی پجار ءِ مانزمان اَنت۔ بلوچستان زانشتجاہ ءِ ھندی زبانانی بھرگانی سر ءَ بندش جنگ راستی ءَ اے زبانانی ھلاسی، ورنایاں چہ آیانی راجی زرمبشت ءَ دور کنگ ءُ راجی زانشت ءِ نزور کنگ ءِ پندل اِنت۔
آئی ءَ گوشتگ کہ بلوچ، پشتون ءُ براھوئی نودربر، زانوگر، لبزانکار ءُ درسیں بھرگانی دیمروئی دوست اے زوراکی ءِبگیری ءَ یک راھبندے ءِ سرءَ یکجاہ بنت۔ ما نہ تھنا اے پیسلہ ءِ ھلاسی ءِ لوٹ ءَ کن ایں، بلکیں ایشی بگیری ءَ لس مھلوک ءُ راجمستری زرمبشتے برجاہ دار ایں۔
آئی ءَ گوشتگ کہ بلوچ اسٹوڈنٹس آرگنائزیشن گوں درسیں نودربر گل، سیاسی پارٹی، استاد ءُ سول سوسائٹی ءَ لوٹ کنت کہ اے زوراکی ءِبگیری ءَ توار چست بہ کن اَنت ءُ اے جھد ءِ بھر بہ بنت۔
