شال : پہ زور بیگواھیں مردمانی پدجنگ ءَ شدکشیں زھرشانی گدان ءَ 5468 روچ سرجم بوتگ۔ دوشمبے ءِ روچ ءَ چہ پنجگور ءَ سیول سوسائٹی ءِ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ شھیداں چہ وتی ھوناں ماتیں سرڈگار سیراپ کرتگ کہ راج یکجاہ بہ بیت، راج ءِ ورنا آشوب ءَ یل مہ کن اَنت ءُ در آمدانی رندگیری ءَ مہ کن اَنت۔ شھیداں وتی سنگ مک داشتگ ءُ دژمن ءِ تیر اِ ش ماںوتی دلبند ءَ جاہ داتگ اَنت کہ راج در آمدانی زبان ءَ گپ جنگ بندات مہ کنت۔ بلوچستان ءِ شھیداں پمیشکا وتی ھون رتکگ اَنت کہ راج دژمنانی ناشریاں گوں ھاکاں ھوار بہ کن آں، آیانی ناشرکاریانی سزا تیوگیں راج ءِ سر ءَ مہ کپ اَنت۔
ماما کدیر دیمتر ءَ گوشتگ کہ شھیداں پمیشکا وتی ساہ ءُ سرندر کرتگ اَنت کہ مئے آھوکیں پدریچ وشھال بہ بیت ، چوش مہ بیت کہ مرچی کسے آیانی ھونانی باپشت ءَ وتی دلیگاں بہ کنت۔ راج ایردستی ءِ زبان، ایردستی ءِ رویشت ءُ ایردستی ءِ زندگی ءِ باروا پمیشکا کینگدار اِنت کہ مرچی راج ءِ لھتیں مردم زورگر ءِ زبان ءَ گپ کنگ ءَ اِنت، اے وڑکدی نہ بیت ءُ ما اے وڑی ءَ کس ءَ نہ ھل ایں کہ راجی مول ءَ مان میار اَنت ءُ درآمدانی ندارگ کنوک بہ بنت۔
