شال : پہ زور بیگواھیں مردمانی پدجنگ ءَ شدکشیں زھرشانی گدان ءَ 5467 روچ سرجم بوتگ۔ یک شمبے ءِ روچ ءَ بی ایس او ءِ بنجاھی سروک شکور، نزیر، مکبول ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ ریاستی زوراکی یکشل ءَ برجاہ اَنت، لشکر کجام جاہ ءَ بہ لوٹ ایت لشکرکشی ءِ نام ءَ لس آبادیاں نشانگ کنت ءُ بلوچانی کشت ءُ کوش ءَ برجاہ دار ایت۔ پہ وتی بے سوبیانی چیر دیگ ءَ کودکیں بلوچ ورنایاں آوار جنت ءُ بارت رند ءَ آیاں دری ڈیھانی چیریں ادارھانی کارمند لیک ایت ءُ کش ایت آیانی ژانگولیں لاشاں چگل دنت۔
ماما کدیر گوشتگ کہ ریاست چہ وتی مکاریاں میان استمانی ادارھانی رد دیگ ءُ آیانی چمانی بند کنگ ءَ بلوچستان ءَدری چیریں ادارھانی دزمانجنی ءِ دروگ ءَ بندگ ءُ وتی نوک آبادکاری ءَ برجاہ دارگ لوٹگ ءَ اِنت۔ ایردستیں بلوچ ءِ مڈیاں لٹگ ءُ وتی لشکری توان ءَ گھتر کنگ ءَ اِنت۔ اے درسیں ھیلھاں ریاستی کارمند ءُ وتگڑیں سیاسی ٹولی ءُ بلوچستان سرکار یک وڑ ءَ شریدار اَنت۔ آ ریاست ءِ زورکیاں چیر دیگ ءُ لشکر ءِ بے بنیادیں ٹاپارانی پلہ مرزی ءَ کنگ ءَ اَنت۔
آئیءَ گوشتگ کہ بلوچستان سرکار ءِ ریاست ءِ گون ءَ وپاداری ءِ سوب ءَبلوچانی سر ءَ زوراکیانی سیمسر گواز کنگ بوگ ءَ اِنت۔بلوچستان ءِ جتائیں ھند ءُ دمگاں لشکر کشی کنگ ءُ ریاستی زوراکی ھمے کلوہ ءَ دیگ ءَ اَنت کہ سرکار پہ وتی نوک آبادکاری ءِ برجاہ دارگ ءَ چہ کشگ ءُ چگل دیگ ءِ شوندات ءَ دست ءَ نہ کش ایت۔
