کیچ: گوستگیں روچ ءَ واشک ءَ دگ ویلے ءَ بیران بوتگیں استاد درویش ازیر ءِ یات ءَ ڈیوا بالینگ بیت۔
اسکول پار آل ویلپیئر آرگنائزیشن ( ایس ایپ اے ) ءِ نیمگ ءَ شنگ بوتگیں جارے ءِ رد ءَ باندا بیگاہ ءِ ھپت ءُ نیم ءَ ایس ایپ اے ءِ سروک درویش ازیز ءِ یات ءَ شھید پدا اھمد چاراہ ءَ ڈیوا بالینگ بیت۔
وانگجاہ ءِ نیمگ ءَ شنگ بیتگیں جارے ءَ گوشتگ کہ درویش ازیز ءِ یات ءُ ستک شانی ندر کنگ ءَ ڈیوا بالینگ بیت، گوں کیچ ءِ دُرسیں مردماں دزبندی کن ایں کہ بھر بہ زور اَنت۔
یات بہ بہ اِت کہ گوستگیں روچاں درویش ازیز چہ کیچ ءَ دیم پہ شال ءَ روگ ءَ بوتگ کہ واشک ءَ بس ءِ چپی بوگ ءَ گوں درویش ازیز ءِ ھواری ءَ بیست ءُ ھشت مردم بیران ءُ باز مردم ٹپی بوتگ اَت۔
بیران ءُ ٹپی بوتگیں مردمانی تہ ءَ نودربر، زھگ، جنین ءُ جتائیں بھرگاں سیادی داروکیں مردم ھوار بوتگ اَنت۔
نمیرانیں درویش ازیز یک راجدار ءُ چاگردی کارکنے بوتگ ءُ آئی ءَ چاگرد ءِ نیزگاریں زھگ مُپت ءَ وانینتگ ءُ اے وانگجاہ ءِ بُندات ھمائی ءَ ایر کُتگ۔درویش ازیز پہ چاگردی گھبودی ءَ نیزگاریں نودربر پہ وانگ ءَ مالی کمک ھم کرتگ اَنت۔
