شال:بیگواھیں بلوچانی توار ( وی بی ایم پی )ءِ سرکماش نسر اللہ ءَ گوشتگ کہ زوربیگواھیں مھمد ھیات ءُ شاہ پیسل ءِ کھولاں آیانی کیس وی بی ایم پی ءِ کر ءَ یاداشتگ کرتگ اَنت۔ آیاں گوں گل ءَ گوشتگ کہ مھمد ھیات مینگل ء شاہ نزر پاکستانی لشکر ءَ ھمے سال ءِ 22 مئی ءَ چہ پڑنگ آباد مستونگ ءَ درکانودی آوار جنگ ءَ پد بیگواہ کرتگ ءُ شاہ پیسل ء جان مھمد ءَ 5 پروری 2022 ءَ چہ نوشکے بازار ءَ آوار جتگ ءُ بیگوہ کرتگ ءُ کھولاں آیانی باروا ھچ سرپدی دیگ ءَ نہ اَنت ھمے سو ب ءَ سکا جنجالانی دیمپان اَنت۔ گل ءَ آیان ءَ دلجمی داتگ کہ مھمد ھیات ءُ شاہ پیسل ءِ کیس ءَ کمیشن ءُ سرکار ءَ دیگ ءِ ھواری ءَ پہ آیانی آجوئی ءَ ھمک جاہ ءَ توار چست کن ایں۔
نسراللہ ءَ گوشتگ کہ ھمے سال ءَ زوریں بیگواھی تیز کنگ بوتگ اَنت، زور بیگواھیں مردمانی دروگیں میڑاں کشگ ءُ آیانی ژانگولیں لاشانی دزکپگ ءِ ویل وی بی ایم پی ءَ دیگ بوتگ اَنت اے سکا بژنی گپے ایشی ایر جن ایں ءُ ھمے لوٹ ءَ کن ایں کہ زور بیگواھیں مردمانی پہ آجوئی ءَ دلجمی بہ دے اَنت۔ زور بیگواھیں مردمانی دروگیں میڑاں کوش، آیانی ژانگولیں لاشانی دزکپگ ءِ درچ زوت بند کنگ بہ بیت۔ اے درکانودی، بے راھبندیں گامگیج ءُ دردناکیں ویلاں ھواریں مردم گرگ ءُ جست کنگ بہ بنت۔ زوریں بیگواھی ءِ جیڑہ ڈیھ ءِ کانود ءِ رد ءَ پہ گیش ءُ گیوار ءَ گامگیج زورگ بہ بیت۔
