![](https://zrumbesh.com/wp-content/uploads/2024/05/WhatsApp-Image-2024-05-28-at-05.44.48_d72e57b4-1024x576.jpg)
شال: پہ زور بیگواھیں مردمانی پدجنگ ءَ شدکشین زھرشانی گدان ءَ 5465 روچ سرجم بوتگ۔ شمبے ءِ روچ ءَ بی ایس او ءِ سرکماش جیھند، کارگشاد ھسیب، یونس ءُ آدگہ مردم پہ ھمدردری درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستان نہ تیوک ءَ زورگپت اِنت آ بلوچ سرڈگار ءِ سر ءَ درسیں مڈیاں لٹ ءُ پل کنگ لوٹ ایت، بلکیں بلوچ راج ءَ چو ریڈ انڈین ءِ جاہ مندانی وڑ ءَ چہ ھستمان ءَ ھلاس یا چہ وتی جند ءِ سرڈگار ءَ کشگ لوٹ ایت۔
ماما کدیر گوشتگ کہ اے زوراکیانی گنتریں درشم اِنت سیاسی کارکن، نودربر، ورنا ءُ مردمی ھکانی سرگرمیں کارکناں ھوار جتائیں بھرگاں سیادی داروکیں ھمک امر ءِ بلوچ پسگ زوریں بیگواھی ءَ پد آیانی ژانگولیں لاشانی چگل دیگ بوگ ءَ اَنت۔ گوستگیں لھتیں ماہ اِنت کہ ھزارانی کچ ءَ مردم آوار جنگ ءُ آیانی ژانگولیں لاش کپتگ اَنت۔ اے درسیں شھیدان ءَ درکانودی آوار جتگ ءُ پد ءَ دروگیں میڑاں شھید کرتگ اَنت، اے درچ انگت ءَ برجاہ اِنت پہ پاکستانی لشکر ءُ چیریں ادارھانی کارمنداں زوراکیانی بازیں جست ودی کنت۔
آئی ءَ گوشتگ کہ بازیں ڈیھ ھیران اَنت کجام سوب ءِ بنیاد ءَ پاکستان ءِ زورگری وتی جاہ ءَ برجاہ اِنت ءُ ناھکیں وڑے ءَ بلوچاں ھلاس کنگ ءَ اِنت۔ پمیشکا بلوچ راج ءَ وتی چکچینی ءِ دلگوش گور اِنت ھمے سوب ءَ پاکستانی لشکر بلوچ ءِ گدان، میتگ ءُ شھراں ھمک روچ لشکرکشی کنگ ءَ اِنت ءُ لس مردماں جنین، زھگ، کماشاں ھوار ھمک امر ءِ مردماں نشانگ کنگ ءَ اِنت۔