شال: پہ زوریگواھیں مردمانی پدجنگ ءَ شدکشیں زھرشانی گدان ءَ 5464 روچ سرجم بوتگ۔ پنچ شمبے ءِ روچ ءَ بی ایس او ءِ سرکماش بالاچ کادر، پیشیگیں سرکماش جھانگیر ازیم ءُ بنجاھی اگدھداراں ھوار مکبول،نزیر، شکور ءُ آدگہ ھمبل پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ راج اے وھد ءَ لاش چست کنگ ءَ اِنت، سرجمیں ھندی آبادی پرسیگ اِنت۔ پیش ءَ بلوچستان ءِ سینگ تل دیگ ءُ مادن برگ بوتگ اَنت نوں آوار جتگیں سیاسی کارکنانی سینگ تل دیگ ءُ آیانی دل ءُ جگر، گٹگ کشگ بوگ ءَ اَنت۔ نوں ریاست پہ وتی مالی کمک ءَ بلوچانی آزایاں کشگ ءَ اِنت۔
آئی ءَ گوشتگ کہ اود ءَلاشانی انبار بہ بیت گڑا اود ءَ مردمانی زندمان وشھال نہ بیت، اود ءَ کہ جنازہ وانگ بنت گڑا اود ءَ دھل ءُ چاپ کنگ نہ بیت۔ اود ءَ کہ مردمانی زندگی پھریز مہ بنت اود ءَ پلانی ھار دست نہ کپ ایت۔ اود ءَ کہ ھونانی شھکور بہ تچ ایت اود ءَ مردم ندارگ نہ چار اَنت۔ اودءَ کہ جنگ بہ بیت اود ءِ ایمنی گپ بے کار اِنت۔
ماما کدیر گوشتگ کہ بلوچستان اے وھد ءِ جنگ آماچ اِنت آ کجام بد بھت اِنت کہ وتی شھیدانی ھونان لگتمال کنت۔
