بلوچ یکجھتی کمیٹی ءِ سروک ڈاکٹر ماہ رنگ ءَ ناروے ءَ PEN ناورے، ورلڈایکسپریشن پورم ءُیوٹیا آئی لینڈ ءِ نیمگ ءَ میان استمانی تک ءَ سے روچی مراگش ءَ بھر زرتگ ۔ ڈاکٹر ماہ رنگ ءَ مراگش ءِ بنداتی روچ ءَ وتی ھیال درشان کرتگ اَنت۔
ڈاکٹر ماہ رنگ ءَ تران کرتگ ءُ گوشتگ کہ گوستگیں دو دھکانی میان ءَ ناشریں کاروائی ءُ ایمنی ءِ نام ءِ سر ءَ بلوچ ورنایانی یک مزنیں کچے، آیانی تہ ءَ گیشتر نودربر، انجینئیر، ڈاکٹر، سیاسی کارکن ءُ اھوالکار اَنت کہ پاکستانی لشکر ءَ زور بیگواہ کرتگ اَنت۔
آئی ءَ گوشتگ کہ ریاست اکوام متھدہ یا ایمنسٹی انٹر نیشنل ءِوڑیں میان استمانی ٹولیاں اے وڑیں مردمی ھکانی پادمال کنگ ءِ باروا پٹ ءُ پول کنگ ءِ موکل ءَ نہ دنت۔ ھندی باسک ءُ ھکانی ٹولیاں آیانی کچانی یکجاہ کنگ یا توار چست کنگ ءِ جھد کرتگ گڑا بیگواہ کنگ بوتگ اَنت۔
ڈاکٹر ماہ رنگ ءَ گوشتگ کہ من چہ دہ سالاں زوریں بیگواھیانی بگیری ءَ توار چست کنگ ءَ آں، چی ءَ کہ آ وھد ءَمنی امر کسان بوتگ من چہ زوریں بیگواھیءَ سانمند بوتگ آں۔ منی پت پاکستانی چیریں ادارھاں زور بیگواہ کرتگ ءُ 2011 ءَ آئی تیرسپتیں لاش دزکپتگ۔ منی کستریں برات 2017 ءَ بیگواہ کنگ بوتگ داں سے ماہ ءَ بلوچستان ءَ توار چست کنگ ءُ زھرشانیاں پد یل کنگ بوتگ۔
ڈاکٹر ماہ رنگ ءَ گوشتگ کہ یک انچائیں کیسے نہ اِنت، منی وڑیں سدانی کچ ءَ جنک ھست۔ مرچی کم چہ کم من اے گپ ءَ زاناں کہ من چورہ ءُ منی مات جنوزام اِنت۔ بلے دگہ سدانی کچ ءَ زھگ،کسان امر ءُ ورنا ھست اَنت کہ آیانی پت، ناکو یا برات بیگواہ اَنت۔ ھپتگ ءُ ماہ بلے لھتیں انچیں ھست آ چہ سالاں اے گپ ءَ زانگ ءَ نہ اَنت کہ مئےآزیز زندگ اَنت یا کشگ بوتگ اَنت۔
آئی گوشتگ کہ مئے تکشام ءِ لوٹانی تہ ءَ اے ھوار اِنت کہ پاکستان ءِ آمیدگس، پارلیمنٹ ءُ لشکر زوربیگواھیں مردماں یل بہ کن اَنت یا آمیدگس ءَ پیش بہ کن اَنت۔
داکٹر ماہ رنگ ءَ گوشتگ کہ پاکستان سرکار جیڑھانی گیش ءُ گیوار کنگ ءِ سر ءَ دلگوش دیگ ءَ ابید زوراکی ءُ لٹ شاپ کنگ ءَ اِنت۔
آئی دسمبر ءِ ماہ ءَ یک ماھے ءَ گیش 1600 کلومیٹر ءَ روانک ءَ شتگیں زھگ ءُ جنینانی گون ءَ سارتی ءَ اسلام آباد ءَ سر بوگ ءِگپ کرتگ ءُ گوشتگ کہ اود ءَ آیانی سر ءَ پولیس ءَ لٹ شاپ کرتگ ءُ زورکیانی ِنشانگ کرتگ اَنت۔
ڈاکٹر ماہ رنگ ءَ گوشتگ کہ پاکستانی چیریں ادارہ مردماں لاچار کنگ ءَ اَنت کہ آ ایمنیں زرمبشت ءِ بھر مہ بنت۔ اسلام آباد ءَ نیشنل پریس کلب ءِ دیم ءَ زھرشانی گدان جنگ ءَ ابید رسانکدر ءَ کمک نہ کرتگ۔ پہ بلوچستان ءِ ایمنی ءَ پرایمنیں جھد برجاہ بیت ءُ آ مردمی ھک ءُ پہ مردمگری ءَ سدک اَنت، درسیں بھرگاں سیادی داروکیں مردماں گوں آیاں یکجھتی ءُ پلہ پرزی کنگ لوٹ ایت۔
ڈاکٹر ماہ ءَ گڈی ءَ PEN ناورے ءُ کارگشاد ءِ منت گپتگ کہ من ءَ اے وڑیں جاھے ءَ گپ جنگ ءِ موہ داتگ۔
آئی ءَ پہ شانے ءَ گوشتگ کہ مئے گپ اود ءَ گوش دارگ نہ بوتگ اَنت بلے مرچی سرجمیں جھان اِش گوش دارگ ءَ اِنت۔
