بلوچ اسٹوڈنٹس ایکشن کمیٹی ءِ نیمگ ءَ شال( کوئٹہ) ءَ ادبی ءُ دودمانی مراگش سباء لٹریری پسٹیول برجم دارگ بیتگ، مراگاہ ءَ گل ءِ بنجاھی کماش شبیر ، بنجاھی مزن کارگشاد ازھر، کمک کارگشاد مھمد ، بنجاھی پتر ءِ باسک پیرجان، آمر ءُ بالاچ بلوچ ساڑی بیتگ اَنت۔ مراگش ءِ مھمان ڈاکٹر منزور، ڈاکٹر پاروک، پروپیسر ھامد، ڈاکٹر باری آجو، اپتکار، پروپیسر منیر،لکچرار مسلم شپی، لکچرار آمران شبیر ءَ ھوار آدگہ استاد، شائر ءُ ادیب بیتگ اَنت۔ دیوان جتائیں بھرانی تہ ءَ بیتگ چوشکہ راجی سوت، تران، پینل ڈسکشن، کسمانک، ڈاکومنٹری پیش کنگ، ٹیبلو، دوچاپی، کتاب میڑہ ءُ بلوچی ساز ءُ زیمل ھوار بیتگ اَنت۔
دیوان چہ بلوچ راجی سوت ءَ بنگیج کنگ بیتگ ءُ دیمتر ءُ گُشتانکی بھر ءِ تہ ءَ پروپیسر ھامد ءَ نمیران سباء دشتیاری ءِ زِند ءُ اِزم ءِ سرءَ تران کرتگ۔ گُشتانکی بھر ءِ تہ ءَ سرکماش شبیر، ازھر ءُ ماھکان ءَ بلوچ نودربر، سیاستءُ بلوچ چاگرد ءِ سرھالانی سرءَ گُشتانک داتگ۔ ھمے پیم دو پینل ڈاکشن بیتگ اَنت کہ آھانی تہ ءَ “بلوچی، براہوئی زبان ءُ ایپسٹومولوجی” سرھال سرءَ مسلم شپیءَ ڈاکٹر منزور ءِ مھمانجلی کتگ ءُ گوں پروپیسر ءَ بلوچی ءُ براہوئی زبان ءِ سرءَ گپ داشتگ۔ دومی پینل ڈسکشن بھر ءَ “ بلوچ بن دپتر” ءِ سر ءَ پاروک ءَ گوں گپ کُتگ کہ آئی ءِ مھمانجل امران شبیر بیتگ۔ اے بھر ءَ بلوچ بن دپتر ءِ سر ءَ جتائیں دلیل ءُ دپتری ریپرنساں گوں گپ ءُ تران بیتگ۔ اے بھرانی ھلاسی ءَ نندوکیں مردمانی گوں مھماناں جُست ءُ پرُسی بھر ھم بیتگ۔
دیمتر ءَ مراگش ءَ جتائیں ڈاکومنٹری پیش کنگ بیتگ چوشکہ نمیران سباء دشتیاری ءِ زِند ءُ اِزم، نمیرانیں زاھر ءُ نمیرانیں نزیر اھمد ءِ سرءَ ڈاکومنٹری ھوار بیتگ اَنت۔ بلوچ چاگرد ءُ چاگرد ءِ جیڑہ ءُ جنجالانی سرءَ ورنایاں مراگش ءَ کسمانک ءُ زھگاں ٹیبلو پیش دارگ ءَ ھوار بلوچی دوچاپی ھم کنگ بیتگ۔ ھمے ڈول ءَ کتاب میڑہ ھم برجم دارگ بیتگ کہ او ءَ جتائیں پبلشراں وتی اسٹال جتگ اَنت ءُ مردماں کتاب زُرتگ۔ اے بھرانی ھلاسی ءَ پد گل ءِ زمہ داراں مراگش ءَ آتکگیں مھماناں چادر سر ءَ داتگ ءُ شرپ بکشاتگ۔
مراگش ءَ تران کنان ءَ مھمان ءُ گل ءِ زمہ داراں جتائیں بنگپانی سرءَ وتی ھیال درشان کرتگ ءُ سبا ءِ اِزم ءِ سرءَ تران کنان ءَ گوشتگ کہ سباء بلوچ ءِ یک کاملیں دانشور ئے اَت کہ یک نپر ئے ءِ جاہ ءَ ادارہ ءِ بستار ءَ کار کنگءَ بیتگ، استاد ءَ بلوچ ءِ زبان، ادب ءُ سیاست ءِ تہ ءَ وتی راجی زمہ داری پیلو کنان ءَ وتی نپری بھر ادا کرتگ۔ دانا ءُ زانتکارے ءَ ھوار یک دلیر ءُ تمردیں جھدکارے بیتگ کہ مدام وتی پگِر ءِ سرءَ اوشتاتگ اَت ءُ ورنا ءُ لس مھلوک ءِ راجی تربیت ءَ کنان اَت۔ بلوچ ءِ زبان ءُ لبزانک ءِ سرءَ جھد ءَ پیش گام اَت ھمے رنگ ءَ دانشوری ءِ راستیں ھک ءَ ادا کنان ءَ بلوچ ءِ جھد ءَ سرجم ءَ ھوار اَت۔
مراگش ءَ بلوچ ءِ زبان ءُ بن دپتر ءِ سرءَ تران کنان ءَ مھماناں گوࣿشت گکہ بلوچ کوھن ءُ کدیماں چہ مزنیں دود ءُ زمینے ءِ واھُند اِنت کہ ھستیں مئے تب ءُ دود گوستگیں نوہ ھزار سال کوھنیں مہرگڑھ ءِ نشانگاں گوں نزیک اَنت۔ بلوچستان تھذیبانی بنجل اِنت کہ ادءَ چہ دگہ بازیں تھذیب درْتکگ اَنت، ھمے پیم اد ءَ آبادیں بلوچ سکیں کوھنیں راجے کہ آئی ءَ وتی راجی پجار جتائیں دودانی وسیلہ ءَ زِندگ داشتگ کہ مئے گورءَ مرچی زبانی بہ زاں کسِوانی دروشم ءَ ھست ءُ زِندگ اَنت۔
مراگش ءَ استاد، ورنا ءُ نودربر، ادیب ءُ شائراں ھوار جتائیں بھرگاں سیادی داروکیں مردماں مزنیں کچے ءَ بھر زُرتگ۔
دیوان ءِ گُڈی بھر ساز ءُ زیملی بیتگ کہ آئی ءِ تہ ءَ وش الھانیں گُشندہ ھالل پرھاد، شاہ سمال ءُ نوید بلوچ ءَ وتی وش تواریں گُٹ ءَ گوں سوت جتگ ءُ بلوچ ءُ بلوچستان نازینتگ۔
مراگش ءِ سرجمیں بھر گوں دلجمی ءَ برجم دارگ بیتگ اَنت ءُ گوںسوبمندیءَ دیوان آسر کنگ بیتگ۔
