کیچ: ھوشاپ ءَ زور بیگواھیں امام جان سوالی، مکسود گھرام ءُ رازک ناسر ءِ کھول ءَ وتی آزیزانی یل نہ کنگ ءِ بگیری ءَ سی پیک دگ بند کرتگ۔ زھرشانی ءَ سیاسی کارکن ءُ لس مردماں بازیں کچے ءَ بھر زرتگ۔ زھرشانی ءِ سوب ءَ دوئیں نیمگاں گاڑیانی مزنیں کتار اوشتوک بوتگ اَنت ءُ مساپر سکا جنجالانی دیمپاں بوتگ اَنت۔
زھرشانی ءَ زوریں بیگواھیں مردمانی کھولاں تران کرتگ ءُ گوشتگ کہ مئے آزیز جتائیں وھداں چہ جتائیں جاھاں آوار جنگ ءُ بیگواہ کنگ بوتگ اَنت، آیانی زوریں بیگواھیاں چنچو ماہ گوستگ بلے آیانی باروا مارا ھچ وڑیں سرپدی دیگ نہ بوتگ کہ چون ءُ کچ ءَ اَنت۔
آیانی گوشگ اِنت کہ مئے سی پیک دگ ءِ بند کنگ ءِ مول ھمیش اِنت مئے زور بیگواھیں مردم آجو کنگ بہ بنت اگاں آیانی سر ءَ چونیں کیس ھست گڑا سرکار آیاں وتی جند ءِ آمیدگس ءَ پیش بہ کنت۔ ما مدام پہ وتی آزیزانی شوھازگ ءَ میر ءُ مھترانی کر ءَ شتگ ایں بلے مارا تھنا دروگیں دلبڈی دیگ بوتگ پہ مئے زور بیگواھیں مردما نی آجوئی ءَ ھچ وڑیں گامگیج زورگ نہ بوتگ۔ دانکہ مئے زور بیگواھیں مردم آجو کنگ نہ بوتگ اَنت ما وتی زھرشانی ءَ برجاہ دار ایں۔
گڈی ءَ چہ کیچ واکدار ءِ نیمگ ءَ ٹولی یے آتکگ ءُ آیاں زور بیگواھیں مردمانی کھول دلجمی داتگ اَنت کہ یک ھپتگے ءِ تہ ءَ شمئے زور بیگواھیں مردم یل کنگ بنت، زور بیگواھیں مردمانی کھوالاں وتی زھرشانی ھلاس کرتگ۔
